Июль айны 9-нда ич ишлени Магьачкъаладагъы Совет район бёлюгюне ахшам сагьат дёртден сонг, Расул Гьамзатовну атындагъы кёп къабатлы уьйлени бирисини къалкъысында белгисиз адам къолунда бичагъы булан ари де, бери де чабып айлана деп билдирген. Ол тез етишип гелген полицейскийлеге къаршылыкъ билдирмеге къарагъан, тек тутулгъан, бичагъы чыгъарылып алынгъан, оьзю полиция бёлюкге етишдирилген.
Бёлюкде соравлагъа адамшавлу, ачыкъ жаваплар берип болмагъан, гьатта полициягъа чакъырылгъан ата-анасын да танымагъан. Огъар медиклени кёмеги тарыкъ экени англашынгъан, амма ол врачлар гелгенче оьлген.
Сонг токъташдырылгъан кюйде, 48 йыллыкъ М.Жабрайылов Акъуша районну Бутри юртунда тувгъан. Украинадагъы хас асгер гьаракатда ортакъчылыкъ этген. Бир-бир ёравлагъа гёре, ол шо гюн наркотиклени къоллагъан болгъан. Тек шо гертими, тюгюлмю, янгыз экспертиза жавап берип болажакъ.
Белгили кюйде, ич ишлени Совет район бёлюгюнде гетген йылны январ айында тутушуп ябушувну устасы Къ.Далгьатов оьлген эди. Суд, ону оьлюмюне айыплы деп, бёлюкню бир нече къуллукъчусун эркинликден магьрюм этген.
Алав АЛИЕВ.
