Алдагъы гюнлерде «Дагестанский аул» деген музейи Къарабудагъгент районну денгиз боюнда ерлешген «Солнечный берег» деген яшланы ял алыв центрында сурат выставка оьтгерген.
«Параддан – фронтгъа» деген шо выставка бугюнлерде оьрде эсгерилген яшланы ял алыв-билим идарасында оьзлени яйлыкъ каникулларын оьтгереген Белгород шагьарлы уланлагъа ва къызлагъа гёрсетилген. Гьаракат бир ерден башгъа ерге гёчеген выставкаланы оьтгеривге байлавлу программаны яшавгъа чыгъарывну оьлчевюнде юрюлген.
Ачыкълашдырып айтгъанда, оьтгерилген выставканы барышында Москва, Куйбышев ва Воронеж шагьарларда 1941-нчи йылларда оьтгерилген парадланы гьакъында баянлыкъ береген суратлар гёрсетилген. Шондан къайры да, яшлагъа дагъыстанлы къатынланы ва къызланы мердешли опуракълары да малим этилген. Эсгерилген музейни директоруну заместители Ирина Гьайбуллаева яшлагъа дагъыстан халкъларыны тарихи, маданияты ва асрулар боюнда юрюлюп гелеген адатлары гьакъда маълумат берип сёйлеген.
Б. АЙБОЛАТОВ
