11-нчи октябрде, Каспийск шагьарны А.Алиевни атындагъы спорт къаласында «ДагАгро – 2023» деген халкъара выставка оьтгерилди. Алтынчы гезик оьтгерилеген юрт хозяйствогъа багъышлангъан чарада бизин уьлкени, шолай да Белорусияны, Азербайжанны Тюркияны 80-ден де артыкъ компаниялары ортакъчылыкъ этди.
Выставканы барышында ортакъчылыкъ этген компанияланы вакиллерине бавчулукъну, чачыв урлукълар болдурувну, аврувлагъа къаршы дарманланы къоллавну гьакъында, шолай да, теплицаларда яшылчалар оьсдюрюлеген инг янгы къайдалар булан таныш болма имканлыкъ бар эди. Дагъыстанда артдагъы йылларда яшылчалар болдурув кёп керенге артгъан ва оьр даражада юрюле.
Дагъыстанны юрт хозяйство ва сурсат министрини биринчи орунбасары Шарип Шарипов оьзюню сёйлевюнде ер-ерден гелген вакиллеге бир-бири булан пикирлешме, англатма ва маълумат берме, ингдеси иш аралыкълар юрютме, дыгъарлар этме имканлыкъ берилегенни эсгерди.
– Артдагъы йылларда Дагъыстанда теплицаларда яшылчалар болдурма ва янгылыкъланы къоллама сюегенлени санаву артгъан, – дей Ш.Шарипов.– «Теплицы Дагестана» деген ассоциация сав йыл пайдалы мал болдурувда иш къурумлагъа кёмегин болдура ва бизин малланы тышгъа чыгъарывда кёп иш этип тура. Бугюнлерде Дагъыстанны ер-еринде къурулгъан теплицалар 700 гектаргъа ювукъ болгъан. Шо да бизге дазу тюгюл. Выставкада оьсюмлюклени аврувлардан сакълайгъан чараланы гьакъында да англатывлар юрюлежек ва янгы алатлар булан таныш болма имканлыкъ да бар. Шулай чаралар регионну юрт хозяйствосуну ишин яхшылашдырма ва агьамиятын артдырма кёмек этежек.
Дагъыстанда теплицалар аслу гьалда Къарабудагъгент ва Къаягент районларда ерлешген. Шолай да, Магьачкъала шагьарны айланасында, Дербент, Хумторкъали, гьатта Лаваша ва Ботлих районларда да ишлейгенлер ёлугъа.
«Теплицы Дагестана» деген илму-производство ассоциацияны ёлбашчысы Арсен Жамалутдинов айтгъан кюйде, оьзлеге 10 йыл бола ва олар яшылчаланы теплицаларда болдурувда бажарывлу ортакъчылар тапма кёмек эте.
– Артдагъы йылларда юрт хозяйствогъа бакъгъан тергев артып тура. Шону учун да инг де алдынлы къайдаланы къоллап, дагъыстанлылагъа сан янлы яшылчалар оьсдюрме имканлыкълар яратыла, – дей ол. –Бизде болдурулагъан къызгъылт памидорну ерли къоллавчулардан къайры, орта россиядагъылар да кёп сююп ала. Мен шу выстаканы оьтгерме кёмек этген Дагъыстанны ёлбашчыларына, юрт хозяйство ва сурсат министерликге баракалла билдирме сюемен.
Шолай да выставканы юрюшюнде теплицаланы къурувда ва ишлетивде тарыкъ болагъан хырслар, янгы сувгъарыв къураллар, дарманлар алмакъ учун да кёп санавдагъы дыгъарлар этилди.
