Савлай Россияда йимик, бизин республикабызда да артдагъы йылларда айлана якъдагъы талапланы гьисапгъа алып пачалыкъ ва мунициапал къуллукъланы яшавгъа чыгъарывда болдурулагъан имканлыкълар тергевню тарта. Маълумат экономикны шартларында къоллавчуланы къуллукъларын кютювге байлавлу юрюлеген гьаракатда янгы электорн къайдалары пайдаландырыла. Йылдан-йылгъа этилинеген къуллукъланы жураларыны артагъанына байлавлу болуп «Пачалыкъ къуллукълар» деген электрон бокъчагъа гьар тюрлю къошумлар болдурулагъаны, конкурслар оьтгерилегени гьакъда айрыча эсгермеге тюше.
Пачалыкъ къуллукъланы электрон къайдалары къоллавчуланы пайдалары учун оьтгерилегени гьакъда «Дагъыстан» деген маълумат агентлигинде Пачалыкъ яшавлукъ инспекциясыны Дагъыстанда иш гёреген къуллугъуну баш инспектору Сергей Касьянов ва «Магьачкъала шагьар» деген мунициапл округуну шагьар жыйыныны башчысны биринчи заместители Хиби Алиев республикабызны масса информация къуралларыны къуллукъчуларына англатывлар берди.
– Яшавлукъ-экономика тармакъда маълумат экономиканы шартларында бар имканлыкълагъа гёре оланы пачалыкъ ва муниципал къуллукъларын кютювде, гертиден де, онгайлыкълар йылдан-йылгъа къолайлаша гелегени разиликни тувдура, – деди Сергей Владимимирович. – «Пачалыкъ къуллукъланы» бокъчасына «Уьй» деген къошум этилинегени де къоллавчуланы онгайы учун пайдаландырылажагъы шекликни тувдурмай. Шондан таба уьй есилерине гьар тюрлю къуллукъланы ёлгъа чыкъмай уьюнден таба битдирмеге имканлыкълар яратылына. Гьакъ тёлевню, ярашдырыв ишлени сан янына байлавлу ва оьзге къуллукъланы гьакъында эсгерилген къошумда тийишли маълуматлар ерлешдирилежек. Шо ишде бизин инспекция Дагъыстанны яшёрюм министерлиги, полицияны учаска къуллукъчулары ва шолай да МФЦ-лени операторлары булан байлавлукъда арагъа алдатывчулар сугъулмасын учун къоллавчуланы аманлыгъына чалышмагъа герек болажакъ. Неге десегиз, янгы къуллукъланы яшавгъа чыгъармакъ учун эсли адамлагъа гёнгюллю ва рагьмулу адамлардан-яшёрюмлерден кёмек герек.
«Онгайлы шагьар шартлар учун» деген милли проектни оьлчевюнде уьлкебизни оьзге регионларында йимик Дагъыстанны шагьарларындагъы уллу кёп квартирлик уьйлени арасында «Лап да тизив уьй», «Инг де тизив орам» деген 2-нчи Бютюньроссия конкурсуну гьасиллери чыгъарыла. Шогъар байлавлу болуп Хиби Къурбанович къысгъаракъ баянлыкъ берди. Белгили болгъан, кюйде эсгерилген конкурсда Каспийск шагьарлылар актив кюйде ортакъчылыкъ эте ва савгъатлы ерлеге ес бола. Олар булан янаша Къызлар ва Магьачакъала шагьарлылар да арт вакътилдерде оьтгерилеген конкурсгъа къуршалагъаны разиликни тувдура.
Къ. Къараев.
