Белгили экени йимик, бизин уьлкени тарихини янгы девюрюнде, демек, Совет Союзу тозулгъан сонг, Россияны пачалыкъ белгилерини бириси гьисапда уьч тюслю байракъ токъташдырылды. Ачыкъ-лашдырып айтгъанда, РСФСР-ни Оьр Советини депутатлары 1991-нчи йылны август айыны 22-синде, Россияны милли байрагъыны гьакъында къарар къабул этди. Шо къараргъа РСФСР-ни Оьр Советини Председателини биринчи заместители Руслан Хасболатов къол салды.

Россияны пачалыкъ белгиси гьисапда уьч тюслю байракъ 1991- нчи йылны ноябр айыны 1-инде тасдыкъ этилди. Арадан заман гетип, 1994- нчю йылны август айыны 20-сында Россияны Президенти Борис Ельцин «Россия Федерацияны Пачалыкъ байрагъыны гюнюне» байлавлу указгъа къол салды. Шонда эсгерилегени йимик, байракъны гюню гьар йыл август айны 22-синде оьтгерилме тарыкъ. Тек байракъны гюню генг кюйде биринчилей 2007-нчи йылда белгиленди.
Россияны байрагъыны уьч де тюсюню гьарисине бир маъна бериле: акъ тюс – парахатлыкъ, тазалыкъ, гёк тюс буса – инамлыкъ ва ачыкъ кёк, къызылы да къанны тюсю – къоччакълыкъ, игитликни белгиси. Шо гьакъда айта туруп, Россияны уьч тюслю Пачалыкъ байрагъына этилеген абур шайлы артгъан.

Артдагъы 30 йылгъа ювукъ вакътини ичинде Пачалыкъ байракъны гюнюне байлавлу уьлкени бары да регионларында йимик, бизин республикада да хас кюйде оьтгерилип геле. Бу йыл да тап шолай болажакъ. Магьачкъалада ва оьзге шагьарларда ва юртларда белгили йыравланы ва чебер иш гёреген коллективлени ортакъчылыкъ этивю булан концертлер оьтгерилежек. Шондан къайры да, яшёрюмлени ва жагьиллени къуршап, шо тархгъа байлавлу оьзге гьаракатлар да оьтгерилежек деп къаравуллана.