Токиода оьтгерилген 32-нчи Яйлыкъ олимпиадада ва 16-нчы Паралимпия оюнларда Да­гъыстандан 28 спортчу ортакъчылыкъ этди. Олар тутушуп ябушув, бокс, регби, чабушув, юзюв, ­енгил атлетика, паратхэквандо ва теннис оюнлагъа къуршалды. Шолай да, дагъыстанлы спортчулар башгъа пачалыкълар учун да оюнларда ортакъчылыкъ этгенни эсгерейик.

 

Эки де оюнларда бизин ватандашларыбыз 3 алтын ва 8 ез медаллар къазандылар. Оланы Россияны Президенти де къабул этди ва тийишли кюйде къыйматлады.

27-нчи сентябрде Олимпиадаланы утгъанлар булан Дагъыстанны Башчысыны борчларын заманлыкъгъа кютеген Сергей Меликов да ёлукъду. Ёлу­гъувда тутушуп ябушувдан олимпия чемпион Завур Угуев, шо оюндан ез медаль алгъан Гьажимурат Рашитов, боксдан 3-нчю ерни къазангъан Зенфира Магьамматалиева, Паралимпия оюнланы ортакъчылары авурлукъ ташлавда алтын медаль къазангъан Муса Таймазов, паратхэквандо ябушувдан уьчюнчю ерлени алгъан Даниил Сидоров ва Зайнутдин Атаев, дзюдодан ез медаль къазангъан Анатолий Шевченко ортакъчылыкъ этдилер.

Сергей Меликов спортчуланы гёрмекли уьстюнлюгю булан бирдагъы да къутлады ва шо оьрлюк ­янгыз Дагъыстанныки тюгюл, савлай Россияны оьк­темлиги экенни айтды.

–Спортда оьр болмакъ учун кёп къыйынлыкълардан оьтме тюше, – дей С.Меликов. – Къаркъарасы сав адамлар учун чу шо къыйын да тюгюлдюр, тек савлугъу ва санлары толу тюгюллеге шо къыйынлыкълар эки керенге арта. Биз сизге акъча савгъатлар онгаргъанбыз, сиз элибиз учун етген оьрлюклеге шо аз буса да ярай, тек бир-бир яшавлукъ гьалларыгъызны онгармакъ учун артыкъ болмас.

Олимпия ва Паралимпия оюнланы утгъанлагъа ва тренерлерине 4-ер миллион, призли ерлер алгъанлагъа ва тренерлерине буса 2-шер миллион манат берилди.

Сергей Меликов жы­йылгъанланы Дагъыстанда энниден сонг спортну ­оьсювюне кёп харж салынажакъгъа да инандырды.

 

Къ.АДИЛБИЕВ.

СУРАТДА: Олимпия оюнланы ортакъчыларыны ва тренерлени

Сергей МЕЛИКОВ

булангъы ёлугъуву.