Дагъыстанны Гьукуматыны Председателини заместители Нариман Абдулмуталибов сентябр айны 11-нде Буйнакск шагьарда ишчи генгеш оьтгерген.

Генгешде ДР-ни юстиция министерлигини, табиат гьаллагъа ва экологиягъа къарайгъан министерлигини, ветеринария комитетини, ветеринариягъа тергев болдурагъан федерал къуллукъну управле-ниесини, табиатны къорув ишни тергейген жаваплы прокуратураны, ва оьзге къурумланы жаваплы къуллукъчулары.

 

Ёлугъувну вакътисинде арагъа салынып ойлашынгъан масъалаланы арасында Буйнакск шагьарны ва районну дазуларында къаравсуз саякъ айланагъан итлени санавун кемитивге, юрт хозяйство гьайванлагъа башалман отлама ёл берилегенликни алдын алывгъа ва чёп алагъожаны  тийишли ерлеге жыйып ёрукълашдырывгъа айрыча тергев ва агьамият берилген.

Генгешни ача туруп, Нариман Абдулмуталибов эсгергени йимик, шо уьч де масъала бугюнлерде оьзлеге лап да кёп тергев берилме ва артгъа салмайлы гьазиринде чечилме тюшеген масъалалар.  Оланы арасындан айырып алсакъ, чёп алагъожаны заманында жыйып, тийишли ерлерине элтип, табиатгъа да, адамлагъа да заралы тиймейген кюйню болдурмакъ айрыча агьамиятлы.

Буйнакск шагьарда яшайгъанлар гиччи чагъындагъы яшланы да, уллуланы да савлугъуна къоркъунчлукъ тувдурагъан, къаравсуз къалып саякъ айланагъан итлени табунларындан таза дегенче ялкъгъан. Шагьарда шолай саякъ итлени жыйып сакъламакъ учун гёрсетилген питомник болса да, эсгерилген масъаланы ёрукълу чечме имканлыкъ бермей.

Къаравсуз къалгъан саякъ итлени ва юрт хозяйство гьайванланы тутуп, хас техникагъа юклеп, заманлыкъгъа сакълама деп  гёрсетилген ерлерде ерлешдирмек учун алынагъан харжны оьлчевю де токъташдырылгъан.

 

Казим КАЗИМОВ.