Москваны Мещанск судунда Дагъыстанны Гьукуматыны алдагъы премьер-министри Мухтар Межитовну уголовный ишине къаралгъан.
Судгъа бакъдырылгъан материаллагъа гёре, 2012-нчи йылда М.Межитов Россияны Оборона министерлигини жаваплы къуллукъчуларын Избербашдагъы радиозавод асгер аэродромлар учун хас алатланы къурма бола деп инандыргъан. М.Межитов бир вакъти оьзю де шо предприятиеге башчылыкъ этип гелген. Тек ахтарывчулар токъташдырагъан кюйде, гьакъыкъатда заводну Оборона министерликни тапшурувун кютмек учун бир имканлыгъы да болмагъан. Буса да, дыгъар байлангъан ва армияны бары да тарыкъ-герек булан таъмин этмеге борчлу пачалыкъ къурум заводгъа башлапгъы 108 миллион манатны бакъдыргъан.Амма арадан кёп заман да гетмейли, шо акъча заводну банкдагъы счётундан ёкъ болгъан ва Оборона министерликни тапшуруву кютюлмей къалгъан.
Ахтарывчулар шо акъчаны Мухтар Межитов урлагъан деп гьисап эте. Судьялар оланы далиллери булан рази болгъан ва Дагъыстанны Гьукуматыны алдагъы башчысын 5 йылгъа эркинликден магьрюм этмек деген къарарны чыгъаргъан. Туснакъ болжалын ол умуми низамы булангъы колонияда оьтгережек.
Белгили кюйде, Мухтар Межитов тутулуп, арадан 22 гюн оьтген сонг, Москвадагъы институтланы бирисинде охуйгъан ону уланы Муртазалиге де къаршы уголовный иш ачылгъан эди. Ол оьзю булан бирче охуйгъан Къазахстанны ватандашы, жагьил къызъяш Томирис Байсафаны институтну дёртюнчю къабатындан ташлап оьлтюрген саялы айыпланып, судну тёресине гёре, къалгъан 13 йылын айланасында къатты къаравулу булангъы, терезелерине челтирлер тутулгъан биналарда оьтгережек. Тюзюн айтгъанда, ондан алда болгъан присяжныйлени суду жагьил адамны шо жинаят-чылыкъда бир айыбы да ёкъ деп гьукму чыгъаргъан эди.
