Муслим Салигьов американы Денвер шагьарында июльну 14-нде ММА ябушувдан оьтгерилген турнирде аргентиналы кочап Сантьяго Понциниббиону утуп, гезикли керен де алдынлыкъны къазангъан. Бу натижа бизин якълы аты сав дюньягъа айтылгъан кочап Муслим Салигьовну VFS ябушувларда етишген 7-нчи, къошулчан ябушувларда буса 20-нчы уьстюнлюгю болуп токътай.
Буйнакск район администрацияны башчысы Уллубий Ханмурзаев аты данга айтылгъан «Кун-фу ябушувну Пачасы» Муслим Салигьовну эсгерилген турнирде етишген уьстюнлюгю булан гьакъ юрегинден къутлай туруп, бизин кочапны къайратлы загьматын, юрегине тутгъан мурадына етишмей туруп токътама хыялы ёкълугъун ва оьзтёрече къоччакълыгъын эсгерген.
— Муслим йимик къайпанмаслыгъы ва тавакеллиги бар кочаплар янгыз ата юртуну, районуну абурун артдырагъандан къайры да, республиканы атын савлай дюньягъа белгили эте, — деген У. Ханмурзаев. – Ол бизин райондагъы «Дюньяны беш ягъы» деген спорт школада тарбия-билим алгъан, белгили тренерлени алдында сынав топлагъан. Бугюнлерде буса М. Салигьов етишген уьстюнлюклер оьсюп гелеген яш наслу учун да уллу уьлгю болуп токътай, жагьиллени де шолай даражалагъа етишме ругьландыра.
Казим КАЗИМОВ.
СУРАТДА: М.Салигьов ябушувдан сонг.
