Артдагъы йылларда юрт хозяйство къуллукъчулагъа болдурулгъан продукциясыны къадарына гёре гьар тонуна, сакълайгъан гьар гьайван-малына ва шолай да ишлетеген гьар гектарына гёре къайтарыш гьисапда субсидиялар бериле эди. 2024-нчю йылдан тутуп пачалыкъны янындан къайтарыш ва иштагьландырыв гьисапда берилеген харжланы алдагъы кююнде увакълашдырмай, бирге къошуп бермеге гёз алгъа тутулунгъан. Шо гьакъда Россияны Гьукматыны янындан хас къарар да къабул этилинген ва уьлкебизни регионларына йиберилген.
Къарарда эсгерилегени йимик, Россияны агропромышленный комплексини лап да агьамиятлы тармакъларын оьсдюрмек учун пачалыкъны янындан этилинеген кёмекни асувлу къолламакъ муратда тийишли чаралар гележекде де гёрюлежек. Савлай уьлкебизде агропромышленный тармакъны асувлулугъун артдырмакъ учун 12 лап да агьамиятлы тармакъланы белгилемеге регионлагъа таклиф этилинген. Шоланы арасындан бешиси Россияны бары да регионларында агротехника чаралар, сайламлы урлукъланы болдурув, жынслы гьайванланы оьсдюрюв, КФХ-ланы ва ЛПХ-ланы якълав, агрострахование учун пайдаландырылажакъ.
Белгили болгъаны йимик, къалгъан еттиси мердешли тармакълагъа гиреген темиркъазыкъ бойларда къубагийиклер оьсдюрегенлеге, гьюрбеч этеген оьсюмлюкню оьсдюрегенлеге, уьлкю ва терек емишлер орнатагъанлагъа, овощ юрт хозяйство оьсюмлюклеге къуллукъ этегенлеге, гьайванмал сакълайгъанлагъа, юзюмчюлюк булан машгъул болагъанлагъа ва шолай да юрт хозяйство продукцияны ишлетип маллар гьазирлейгенлеге кёмек харжлар берилежек.
Эсгерилген тармакъланы арасындан гьар регион оьзлеге лап да агьамиятлы саналагъан уьчюсюн айырып гёрсетмеге тарыкъ болажагъы гьакъда да айрыча эсгермеге тюше.
Къ. КЪАЗАКЪМУРЗАЕВ.
СУРАТДА: юзюм бав салывгъа айрыча тергев бериле.
