Шулай ат булан Магьачкъалада М. Горькийни атындагъы орус драма театрда Дагъыстанны халкъ шаири Расул Гьамзатовну 100 йыллыгъына багъышланып музыкалы-драма концерт оьтгерилди. Бу концертни Дагъыстанны опера ва балет пачалыкъ театры онгаргъан. Театрны директору Магьаммат Абасов айтгъан кюйде, бу проект РФ-ни Гьукуматыны грантына гьазирленген.
«Расул Гьамзатовну 100 йыллыгъын оьтгермек учун биз эки грант алдыкъ. Бизин проектни якълап, кёмек этгени учун ДР-ни маданият министри Зарема Бутаевагъа гьакъ юрекден разилигимни билдиремен», – деди концерт башлангъанча оьзюню сёйлевюнде М. Абасов.
Концертни алдында болгъан конференцияны вакътисинде театрны коллективи оьзлер бу проектни яшавгъа чыгъаргъанны гьакъында хабарлады. Р.Гьамзатовну поэзиясын билмейгенлер аздыр. Тек сагьнада ону шиъруларын чебер кюйде артистлер охуйгъанда, сагьналашдыргъанда олар бюс-бютюнлей башгъача чалына ва тынглавчулагъа этеген таъсири арта.
Операны ва балетни театрыны баш хормейстери, бу проектни ёлбашчысы Эмилия Шихрагьимова хабарлагъан кюйде, Р.Гьамзатовну яратывчулугъун хор булан байлап шулай концерт онгармакъ тезден гёз алгъа тутулгъан болгъан. Муна гьали шо муратлар яшавгъа чыкъгъан. Театрны хору бу концертде аслу ерни тута. Проектни яшавгъа чыгъармагъа Санкт-Петербургдан гелген режиссёр Дмитрий Павлов кёмек этген.
Концертде Дагъыстанны ва Россияны композиторлары М.Кажлаевни, Ш. Чалаевни, А.Жапарованы, Г.Камбарованы, И .Казаковну, В.Салмановну, А.Пирумовну макъамлары согъулуп турду. Композиторлар Р.Фаталиев ва С.Екимов бу проект учун янгы музыка асарлар яратгъан ва олар концертде согъулду
Дагъыстанны опера ва балет театры йыл битгенче Россияны башгъа регионларында да бу концертни гёрсетип туражакъ.
Я.БИЙДУЛЛАЕВ.
СУРАТДА:концертден гёрюнюш.
