Бизин республикада «Земский доктор/фельд­шер» деген программа 2012-нчи йылдан берли иш гёрмеге башлагъан.  Алдагъы гюнлерде «Дагестанская правда» газетни редакциясында оьтгерилген прес-конференцияда  Дагъыстан Республиканы савлукъ сакълав министри Татьяна Беляева эсгерилген  программаны гьакъында айта туруп, 2012-нчи йылдан берли 1800 касбучу савлукъ сакълав тармакъда ишге алынгъанын эсгерди.  Ону айтывуна гёре,  ДР-ни савлукъ сакълав министерлигини сайтында ерлердеги медицина къурумлагъа етишмейген касбучуланы сиягьы ерлешдирилген.

 

«Земский доктор/фельдшер» программагъа гёре районлагъа, шагьар-лагъа ишге тюшгенлеге  пачалыкъны янындан 1 миллион манат акъча, бармагъа-гелмеге йыракъдагъы  ва четим районлагъа ишлемеге  гелгенлеге  1 миллион 500 манат харж бериле.  Фельдшерлеге буса 500-750 минг манат  тёлене.  Министрни айтывуна гёре, алда  эсгерилген программада янгыз  яш касбучулагъа  ортакъчылыкъ этмеге имканлыкъ бериле эди. Бу йылдан башлап «Земский доктор/ фельдшер»  программада ортакъчылыкъ этеген-лени сынавуна ва чагъына тергев берилмей. Аслусу – касбучуну хас квалификациясы ва гиччи юртларда яда ватандашларыны  санаву 50 мингден артыкъ тюгюл шагьарларда ишлемеге разилиги болмагъа герек.

«Земский доктор/фельд­шер»  программада ортакъчылыкъ этип ишге тюшген яш касбучулагъа берилеген аслу харждан къайры 2 алапаны къадарында къошум харж  да тёлене.  Бу программада касбучулар яшавунда янгыз бир гезик ортакъчылыкъ этмеге бола ва ишлемеге баргъан еринде 5 йыл чалышмагъа борчлу.

Т. Беляева билдиргенге гёре,  бу йыл  шо программаны айланасында 89 адам ишге алынгъан буса да,  касбучулар етишмейген кёп районлар бар. Мисал учун Дахадаевский районда – 30,  Магьарамгент районда – 26, Къызылюрт районда – 17, Бабаюрт районда 14 касбучулар етишмей. Шолай районлар дагъы да кёп бар.

Ерлерде  педиатр, фтизиатр, реаниматолог, онколог, психиатр касбу-чулар къыт. Шо къытлыкъ ватандашлагъа заманында  ва тындырыкълы кюйде медицина къуллукъланы кютмеге четимликлер тувдура.

Шоланы барын да гёз алгъа тутуп ДР-ни савлукъ сакълав министри  медицина къуллукъчуланы «Земский доктор/фельдшер» программада ортакъчылыкъ этмеге чакъырды.

 

П. БЕКЕЕВА.