Оьтген талатгюн, 27-нчи февральда, Дагъыстанны маълумат ва печат агентлигини ёлбашчысы Абдуразакъ Жамалутдинов жыйылгъанланы алдында гьисап бере туруп, 2023-нчю йылда этилинген ишлени айтды.

 

Шолардан аслуларын эсгере туруп, Расул Гьамзатовну 100 йыллыкъ юбилейине 100 минг тиражы булан китаплар чыкъгъанны, милли тиллерде чыгъагъан газетлер бирикдирилип «Этномедиахолдинг» къурулгъанны, «Дагъыстан» деген респуб­лика телекомпанияны бинасы янгыртылгъанны,  «Дагъыстан» деген республика маълумат агентлигинде прес-конференциялар оьтгермек учун янгы талаплагъа жавап береген майданча онгарылгъанны ва шолай ишлер «Дагъыстан» деген издательствода ва оьзгелеринде де юрюлегенни айтды.

Абдуразакъ Абдулва­гьапович ана тиллени сакълавда ва оьсдюрювде этилеген ишлени гьакъында да толу кюйде англатыв берди. Республикада 13 тилде газетлер ва журналлар чыгъарыла, телевидениелерде де шонча тилде берилишлер юрюле ва издательстволарда ана тиллерде кёп китаплар чыкъгъан.

Оьтген йылда маълумат къуралланы къуллукъчуларына кютмек учун кёп иш болгъанны, тек бу йыл да алдагъысындан тынч болмажакъны айтды. Журналистлер маълуматланы халкъгъа жанлы кюйде заманында етишдирме герек касбучулар. Олагъа кёп тюрлю маълуматланы жыйма, шону гёзден гечирме ва англашылагъан кюйде адамлагъа етишдирме гереклер.

Шолай да, жыйында «Дагъыстан» деген журналны баш редактору Марат Гьажиев. «Этномедиа­холдингни» ёлбашчысы Арсен Юсупов, «Дагъыстан» деген телекомпанияны ёлбашчысы Камила Гьамзатова ва башгъалары сёйледилер.

Дагъыстанны Башчысыны ва Гьукуматыны администрациясыны ёлбашчысыны орнунбасары, Дагъыстанны Башчысыны маълумат-политика управлениесини начальниги Рашит Акавов ва Дагъыстанны топуракъ ва мюлк аралыкъларыны министри Завур Эминов да оьзлени ойларын айтдылар.

Жыйынны ахырында оьтген йылда къыйматлы ишлеген къуллукъчулар гьюрметлев грамоталар булан савгъатланды.

 

Бизин мухбирибиз.