Алдагъы гюнлерде  оьтгерилген Дагъыстанны Гьукуматыны генгешинде бизин республиканы гьакимлик къурумларында, айрыча алгъанда, савлукъ сакълав тармакъда маълуматланы аманлыгъын  болдурувну таъмин этив масъаласы арагъа салынып ойлашылгъан.

Дагъыстанны Гьукуматыны ёлбашчысы Абдулмуслим Абдулмуслимов оьзюню сёйлевюнде шо масъалагъа байлавлу иш гёреген  комиссиясы къабул этген къарарланы бары да гьакимлик къурумлары  яшавгъа чыгъармагъа тюшегенин айрыча эсгерген.

Ол билдиргени йимик, бугюнлерде гьалиги талапгъа жавап береген кюйде янгы технологиялар оьсюп тура.

Маълуматлар булан пайдаланмакъ учун  онгайлы шартлар тувулунгъан бизин девюрде шоланы аманлыгъын болдурувда компьютерлерден таба бир тюрлю  къоркъунчлукълар тувулуна. Тувулунгъан шо гьалны гьисапгъа алып,  эсгерилген тармакъда арасы бёлюнмейген кюйде мекенли ва ёрукълу иш юрютюп турмагъа тюше. Нечик алай да, ишлетилген маълуматланы есисинден къайры гьеч ким алышдырмагъа болмайгъан кююнде сакъланмагъа тарыкъ.

Оьтгерилген генгешде айтылгъанда йимик, Дагъыс­танны  министрликлерини, олай да маълумат технологияланы  республика центрыны жаваплы къуллукъчуларына  шо тармакъгъа байлавлу яшавгъа гийирилген законланы бир-бир гесимлерине  алмашынывлар ва  толумлашдырывлар этмек учун  таклифлер гьазирлемек  тапшурулгъан.

Шону  булан бирге, оьрде эсгерилген центрны касбучулары  гьакимлик къурумларыны 12-синде  тергевлер оьтгерген. Шо  тергевлени  гьасиллерине гёре йиберилген кемчилик­лени тайдырмакъ учун  яшавгъа  чыгъар­магъа  тюшеген борчлар белгиленген. Маълуматланы аманлыгъын  болдуруп, шо тармакъдагъы гьаракатны камиллешдирмек муратдагъы  иш гележекде де узатылажакъ.

 

Н. БАЙБОЛАТОВ.