Март айны 19-нда Магьачкъала шагьарда сувтюп гемечи Магьаммат Гьажиевни эсделигине багъышлангъан митинг оьтгерилди. О чараны ДР-ни спортгъа, туризмге ва яшёрюмлени ишлерине къарайгъан комитетини Магьачкъала шагьар администрациясы оьтгердилер. Митингде ёлбашчы къуллукъчулар, охув ожакъланы, политика партияланы ва жамият къурумланы вакиллери ортакъчылыкъ этди.
Митинг М. Гьажиевни ва М. Умахановну атындагъы орамлар къошулагъан ерде М. Гьажиевни памятнигине гюллер салыв булан башланды. Ондан сонг Ленинчи комсомолну атындагъы паркда уьлкени азатлыгъы учун ябушгъанлагъа салынгъан памятникни алдында узатылды. Онда жыйылгъанланы кадет корпусну охувчулары ва шагьарны билим берив ожакъларыны яшлары байракълар, транспорантлар булан къаршыладылар.
Митингде шагьар администрацияны атындан шагьарны башчысыны заместители Запир Алхасов сёйледи. Ондан сонг отставкадагъы генерал-майор, «ТОКС» деген къурумну председатели Омар Муртазалиев жыйылгъанланы байрам гюн булан къутлады ва Игитни макътавлу ишлери гьакъда бирдагъы керен де эсгерди.
1942-нчи йыл, 12-нчи октябрде сувтюп гемени капитаны Магьаммат Имадутдинович Гьажиевге Совет Союзну Игити деген ат бериле. Ол Ленинни эки ордени, Къызыл Байракъ ордени, кёп санавдагъы медаллар ва дав савут булан савгъатлангъан. Мурманск областдагъы шагьаргъа да ону аты берилген. Мурманск, Полярный, Североморск, Уст-Каменогорск шагьарланы орамларына да ону аты къоюлгъан.
Митингде болгъан сёйлевлени жамын чыгъара туруп, ДР-ни туризмге ва яшёрюмлени ишлерине къарайгъан комитетини председатели Марат Ибрагьимов жыйылгъанлагъа баракалла билдирди ва Магьаммат Гьажиевни аты бизин Ватанны тарихине даимге гиргенни гьакъында айтды.
А. Гьамзаев.
