Айланч буса да ёл яхшы деп негьакъ айтылмай. Четим тав шартларда яшайгъан дагъыстанлылагъа шо гьакъда айта турмасакъ да англашыла.Тезде Анжиден Темирхан Шурагъа салынгъан ёл да шону ачыкъдан ташдыра.
Республикабыздагъы ёлланы къурувну масъаласына гёре гьазирленген «Асил ёллар-аманлыкъны ёллары» деген милли борчну оьлчевюнде 2024-нчю йылда 45 чакъырымдагъы автомобиль транспорт ёлланы ярашдырмагъа гёз алгъа тутулгъан. Шондан 33,7 чакъырымы регион ва муниципал талаплар учунгъу ёллар ва къалгъан 11,7 чакъырымы тахшагьарыбызны ичиндеги орамлар.
Шогъар байлавлу болуп ДР-ни транспорт ва ёл хозяйство министерлигини башчысы Жамболат Салавов республикабызны маълумат къуралларыны къуллукъ-чуларына къысгъаракъ баянлыкъ берген.
– Алгъа салынгъан борчланы яшавгъа чыгъармакъ муратда 2024-нчю йылда къуруп пайдаландырывгъа бермек учун республика бюджетден ломай харж – 1,2 миллиард манат гёрсетилгени гьакъда айрыча эсгермеге герек, – деген Жамболат Шапиевич. – Ёлланы ярашдырывгъа байлавлу болуп къурулуш ишлер респуб-ликабызны 5 районунда ва шолай да Магьачкъаланы дазуларыны ичиндеги орамларында оьтгерилежек.
Айырып айтгъанда, Манас – Сергокъала – Первомайское ва шолай да Буйнакск – Гимра – Чирката участкаларда ёлланы онгарывгъа байлавлу аслу къурулуш ишлер юрюлежек.
Шолайлыкъда, уьстде эсгерилген милли борчну оьлчевюнде токъташдырылгъан адамлар ва шолай да машинлер юрюйген ёллардагъы низамны ва аманлыкъны болдурмакъ учун ерерде онгайлы къуллукълар да болдурулажакъ демеге ярай. Магьачкъалада 18 орамны ярашдырмагъа умут этилине.
Гьазирлеген Къ. КЪАЗАКЪМУРЗАЕВ.
