Сав дюньягъа белгили Дагъыстанны «Лезгинка», деген пачалыкъ ансамблини коллективини дыгъарына гёре, ювукъ арада Бирлешген Арап Эмиратларда оьзлени концерт программасын гёрсетежек. Дослукъ аралыкъланы юрютмек учун араплар Дагъыстанда болгъанда, сёйлешивлени натижасында шолай дыгъаргъа къол салгъан.
Ансамбльни директору Жанболат Магьамматов арапланы делегациясын «Культура» деген милли проектни оьлчевюнде юрюлеген гьаракатлагъа байлавлу этип, бийивчюлер репетиция этеген уьйге алып баргъан. Къонакълар бизин ансамбльни артистлери бийийген жагьлыкъгъа, инчеликге, оьр даражадагъы пагьмугъа къарагъан сонг ансамбльни оьзлеге къонакълыкъгъа чакъыргъан.
«Бизин пачалыкъда гьар айда маданият фестиваллар оьтгериле. Биз ансамбльни къонакълыкъгъа чакъырабыз», деген доктор Халифа Мубарак Аз-Захари. Дагъы да бизин гьакимият къонакъланы бу йыл Дагъыстанда оьтгерилеген «Горцы», деген фестивальда ортакъчылыкъ этме чакъыргъан.
2022-нчи йылда Дубайда оьтгерилген бютюндюнья фестивальда «Лезгинка» ортакъчылыкъ этип, кёп къаравчуланы разилигин алгъан болгъан. Бу йыл да олар Эмиратлагъа чакъырыв булан баражакъ. Россия Федерацияны ва Бирлешген Арап Эмиратланы маданият тармакъдагъы аралыкълары йылдан-йылгъа беклеше.
Я. БИЙБОЛАТОВ
