Гьали-гьалилерде ДР-ни юрт хозяйство ва сурсат министри Мухтарбий Ажековну башчылыгъы булан оьтгерилген генгеш «От тюшювлени алдын алмакъ учун минерал кюйлевючлени сакълавну къайдалары» деген агьамиятлы масъалагъа багъышлангъаны англашыла эди.

Генгешде ортакъчылыкъ этген районланы вакиллерине гюнлюк низамгъа салынгъан масъалагъа байлавлу болуп тийишли англатывлар берилген сонг  минерал кюйлевючлени, айрокъда аммиак селитраны, сакълавну низамын бузма тюшмейгени гьакъда айрыча буварыв этилинди.

 

Арагъа салынгъан масъалагъа байлавлу болуп генгешни ортакъчылары оьзлени пикруларын малим этген сонг пайдалы таклифлер берген. Берилген таклифлеге гёре гьар районда минерал кюйлевючлени сакълавну масъалалары булан машгъул болагъан ишчи группаланы къурмагъа гёз алгъа тутулгъан.

Генгешден сонг министерликни оьсюмлюкчюлюк управлениесини начальниги Жамболат Шайипов ва агрохимия къуллугъуну  касбучусу Магьамматрасул Алиханов биринчи ишчи сапары булан Къаягент районгъа гелген. Районда олар кюйлевючлени сакълавну ва къоллавну къайдалары-низамы булан ювукъдан таныш болгъан.

Жамболат Шайибовну Къаягент райондагъы юрт хозяйство управлениесини начальниги Абдулбасыр Къадиев оздургъан ва минерал кюйлевючлер сакъланагъан ерлеринде, болдурулгъан  шартлар булан ювукъдан таныш этген.

– Къаягент районну юрт хозяйство предприятилеринде минерал кюйлевючлени сакълавгъа тергев бериле, тийишли шартлар яратылгъан, – деген оьзюню ишчи сапарыны жамын чыгъара туруп Жамболат Шайибов. Кёп йыллыкъ сынав гёрсетегени йимик, аммиак селитра кюйлевюч гьисапда аслу гьалда язбаш авлакъ ишлер юрюлеген гюнлерде къоллана. Буса да, бир-бир хозяйстволар селитраны алданокъ гьазирлеп къойма муштарлы болагъаны гьакъда унутмай сакълавгъа салынагъан ерлеринде тийишли шартланы болдурувдан хантав къалмагъа ярамай.

 

Къ. КЪАРАЕВ.

Жамболат Шайибов (солда) юрт хозяйство управлениени начальниги Абдулбасир Къадиев булан пикру алышдыра.