Буссагьатгъы вакътиде чакълар ёрукълу, гёнгюбюз арив. Тек сувукълар гелгенни билме де билмей къалажакъбыз. Шону учун да къышны гьайын яйда, геч къалсанг, гюзде этсе яхшы. Дагъыс­танны Башчысыны борчларын заманлыкъгъа кютеген Сергей Меликов гезикли генгешин шо масъалагъа багъышлады ва бугюнлерде инг аслу масъала деп токъташдырды.

 

Гертисин айтса, къышгъа ­он­­гарылывну масъаласына гьар йыл гюзде къарала, тек сувукълар болгъанда нечик гьазирлен­генибиз билинип къала. Шо иш­лер де яшавлукъ-коммунал хо­зяйствогъа тапшурулгъан. Тек оланы толу кюйде гьазир болгъан заманындан кёп зат гьасил бола. Къышда газны гючю осал бола, электрик токланы гючю де кемий, трансформаторлар яллай. Нати­жада уллу уьйлерде яшайгъан­ ватандашлар къыйнала.

С.Меликов оьзюню сёйлевюнде шолай гьаллар болмасын учун, жаваплы къуллукъланы ёлбашчылары гёрсетилген харжлар толу экенни ва ерлеге етишгенни, ерли гьакимиятлар тапшурувланы кютеген кюйню ва хатабалагь болса, шону тез тайдырмакъ учун гьазирликни тергемекни тапшурду.

–Гьакимият билдиреген кюйде, къышгъа гьазирлик 89 процентге етише, – дей Сергей Алимович. – Ростехнадзор билдиреген кюйде буса, гьал айтардай яхшы тюгюл. Магьачкъала, Дагестанские Огни, Дербент, Южно-Сухокумск, Къызылюрт, Каспийск, Избербаш шагьарлардагъы гьазирлик разисизликлер тувдура. Шону учун да бир айны ичинде кемчиликлени тюзлеп, ноябрге адамлагъа иссилик берме толу гьазирлик болма герек.

Дагъыстанны Башчысы газны ва электрик гючню берилеген кююн негьакъ эсгермеди. «Россети Северный Кавказ» деген компаниягъа гиреген «Дагэнерго» республиканы 35 районунда 891 миллион манатгъа иш этип тура. 479 миллионгъа хас техника алынгъан. Къалгъанына буса ярашдырыв ишлер юрюлген. Алдан берли айтылса да, шо компания Магьачкъалада ярашдырыв ишлер юрютмек учун акъча гёрсетип битмеген. Газпром жамият къурум булан да толу кюйде дыгъарлар этилинмеген.

Жыйында сёйлеген Дагъыс­танны Гьукуматыны Председатели Абдулпатагь Амирханов болуп къалар четимликлени алдын алмакъ учун Къызылюрт, Дагестанские Огни, Хасавюрт ва Каспийск шагьарлардагъы котельныйланы янгыртмакъ учун проектлер этилип турагъанны айтды. Гелеген йыл шо шагьарларда янгы котельныйлар ишлежек. Бу къышда да шолагъа таман чакъы кёмек этилинежек.

Бугюнлерде жаваплы къурумлар кёп къабатлы уьйлеге исив береген имаратланы, исси-сувукъ сув гелеген кюйню, котельныйланы тергев булан бирге, адамлар булан дыгъарлар этивню де юрюте.

«Россети Северный Кавказ» деген компаниягъа гиреген «Даг­энергону» ёлбашчысы Магьаммат Абдурашитов ва Газпром жамият къурумну директору Ризван Къазимагьамматов да оьз­лер кютген ишлени гьакъын­да айтдылар.

 

Къ.АДИЛБИЕВ.