Май байрамланы алдында ­ Дагъыстанны Гьукуматыны Председатели Абдулмуслим Абдулмуслимов ДР-ни Башчысы Сергей Меликовну атындан яшавлукъ-экономикада етишген уьстюнлюклери учун 41 адамгъа пачалыкъ савгъатлар тапшурду. Шоланы арасында врачлар, муаллимлер, инженерлер, художниклер, язывчулар, артистлер ва башгъа касбуланы есилери бар эди.

 

«Дагъыстан Республиканы алдындагъы къуллукълары учун» деген орден берилгенлени арасында бизин иш ёлдашыбыз, «Дагъыстан» деген издательствону директору Умаросман Гьайбуллаевич Гьажиев де бар. Биз ону къыйынын тийиш-ли кюйде белгилейген савгъатын къутлай туруп, ону намуслу иши толу кюйде къыйматлангъанны айтма сюебиз. Умаросман Гьайбуллаевич китап чыгъарывда янгы адам тюгюл, шо ишге ол сав оьмюрюн багъышлагъан.

У.Гьажиев 1959-нчу йылда Къарабудагъгентде тувгъан. Юртдагъы орта школаны яхшы къыйматлагъа битдирип, 1977-нчи йылда Дагъыстан пачалыкъ университетни филология факультетине охума тюше. Яхшы охуй­гъан студентлени арасындан сайлап, 1980-нчи йыл ону Ленинграддагъы пачалыкъ университетни журналистика факультетине йибере. Яш улан шону яхшы къыйматлар булан  тамамлай.

1993-нчю йылда «Дагъыстан» деген китап чыгъарыв уьйню ёлбашчысы болуп белгилене. Шо къурумну ол къургъан, оьсдюрген ва темиркъазыкъ бойдагъы шолай издательстволаны инг де гёрмеклиси болуп токътагъан.

Ол кёп санавдагъы выставкаларда ортакъчылыкъ эте, артдагъы 10 йылны ичинде Умаросман Гьайбуллаевич 20 тюрлю выставкаларда болгъан. Минскде, Астанада, Тюркиядагъы Эскишейирде, Москвада, Новосибирскиде, Саратовда, Уфада болгъанларындан ол бир де савгъатсыз къайтмагъан. Савгъатдан къайры да, ол шондан бай сынав алып къайтгъан. Ол оьзю чыгъа­рагъан китапланы бирисин де охумай къоймай, материал  китап болуп чыкъгъанча, оьзю де ортакъчылыкъ эте.

Башгъа ерлерде гёргенинден дагъы да яхшы этип чыгъармакъны оьзюне борч этип сала. Дагъыс­танны тарихи китаплардан эсе, дагъы къайда сакъланма бола? Гьар йыл Дагъыстангъа гелеген къонакъланы ва туристлени иштагьландырмакъ, савгъат этип алып гетмек учун этилеген иш де таманлыкъ эте. Олар учун «Девюрню сураты. Дагъыстанны тарихи суратларда» деп аты булан чыгъарылгъан 4 тюрлю китап савлай асруну къуршай. «Дагъыстан – къонакъланы къараву булан» деген 5 китабы да къыдырса табулмайгъанларыны сыдраларына гирген.

Магьаммат Аваби Акъташыны «Дербентнамэ» деген мукъаятлы этилинген китабы да 14 тюрлю тилде чыгъарылгъан ва Дагъыстанны алтын фондуна гирген.

Расул Гьамзатовну 100 йыллыгъына багъышлангъан накъышланып этилинген китапланы гьакъында айрыча айтма ярай. «Дагъыстан» деген издательствода белгили шаирни 100 минг тираж булан 20 тюрлю китабы чыгъарылды. Шоланы малим этиливю Магьачкъалада, Москвада, Санкт-Петербургда, Уфада ва Россияны Пачалыкъ Думасында да оьтгерилди.

Умаросман янгыз китап чыгъарып турмай, республиканы жамият-политика ишлеринде де ортакъчылыкъ эте. Ол тюрлю-тюрлю йылларда Магьачкъала шагьарны депутаты, шагьар жыйынны председателини 1-нчи орнунбасары, «Бирикген Россия» деген партияны исполкомуну ёлбашчысы, Россияны халкъларыны ассамблеясыны регион бёлюгюню сопредседатели, Дагъыстанны жамият палатасыны председателини орнунбасары ва уьч керен Дагъыстанны маълумат ва печат комитетини, минис­терлигини ёлбашчысы болуп да чалышгъан.

2024-нчю йылны башында Умаросман Гьайбуллаевич Россияны китап чыгъа­рагъан ассоциациясыны правлениесини ортакъчысы болуп сайлангъан.

41 йыл намуслу ва жаваплы иши саялы ол кёп тюрлю белгилер булан савгъатлангъан. «Дагъыстан Республиканы алдындагъы къуллукълары учун» деген ордени ону гьаракатын герти кюйде суратлайгъан савгъатланы бириси гьисап­лана. Арты узакъ болсун!!!

 

Гебек КЪОНАКЪБИЕВ.