Умаросман Гьайбуллаевич Гьажиевге 5-нчи июльда 65 йыл бите. 60 йылдан сонг экинчи яшлыкъ башлана дей. Ону гьаракатына къараса, яшлыкъ ондан гетме де гетмеген деп ойлашма боласан. Яшдан берли охувгъа гьасирет улан шо мердешни гьали де ташламагъан.

Ленинграддагъы пачалыкъ университетни журналистика бёлюгюн битдиргенден берли, печат къурумларда ишлеген, тек аслу иши китап чыгъарыв булан байлавлу.

1993-нчю йылда «Дагъыстан» деген китап чыгъарыв уьйню ёлбашчысы болуп белгилене. Шо къурумну ол къургъан, оьсдюрген ва темиркъазыкъ бойдагъы шолай издательстволаны инг де гёрмеклиси болуп токътагъан. Артдагъы 10 йылны ичинде Умаросман Гьайбуллаевич 20 тюрлю халкъара выставкаларда ортакъчылыкъ этген ва ол чыгъаргъан китаплар алда бир керен бири де ес болмагъан савгъатланы алгъан.

Артдагъы йылларда чыгъаргъан китаплары бир нече фестивалларда ва конкурсларда гёрмекли ерлеге ес болгъан, шо буса ол оьзюню ишин кёп сюегенликни ва бажарывлу адам экенин исбатлай.

Умаросман янгыз китап чыгъарып турмай, республиканы жамият-политика ишлеринде де ортакъчылыкъ эте. Ол тюрлю-тюрлю йылларда Магьачкъала шагьарны депутаты, шагьар Жыйынны председателини 1-нчи орнунбасары, «Бирикген Россия» деген партияны исполкомуну ёлбашчысы, Россияны халкъларыны ассамблеясыны регион бёлюгюню сопредседатели, Дагъыстанны жамият палатасыны председателини орнунбасары ва уьч керен Дагъыстанны маълумат ва печат комитетини, министерлигини ёлбашчысы болуп да чалышгъан. Къайратлы загьматы учун ол гьали-гьалилерде «Дагъыстан Республиканы алдындагъы къуллукълары учун» деген орден булан савгъатланды.

Умаросман Гьайбуллаевич, сизге башлап савлукъ, ишигизде уьстюнлюк ёрап, чыгъаргъан китапларыгъыз охувчуланы гьар даим де сююндюреген болсун деме сюебиз!

 

«Ёлдаш» газетни редакциясыны коллективи