Бугюн, август айны 10-да, «Дагестан» деген маълумат агентлигинде гезикли пресс-конференция болду. Шону барышында ДР-ни милли политикагъа ва дин масъалалагъа къарайгъан министри Энрик Муслимов, олай да гьаж намаз къылмагъа Сауд-Арабыстангъа етишдирмекни къастын болдурагъан «Марватур» деген компанияны Магьачкъаладагъы бёлюгюню ёлбашчысы Болат Къурбанов бизин республиканы маълумат къуралларыны мухбирлери булан ёлукъду.
Шо шо пресс-конференцияда бу йылда дагъыстанлы бусурманлар учун сыйлы топуракъгъа барып гьаж намаз къылыв не даражада оьтгерилгени малим этилди.
Энрик Муслимов билдиргени йимик гьар йылда оьзю ёлбашчылыкъ этеген министрликни къуллукъчуларынагьаж намаз къылыв булан байлавлу къурумчулукъ масъалаланы ругьани управлениеси булан бирликде кютмеге тюше. Шо гьаракатда гьаж намаз къылмагъа барагъанланы Сауд-Арабыстангъа етишдирмекни оьзюне борч этип алгъан «Марватур» деген компанияны вакиллери де, оьзге пачалыкъ къурумланы жаваплы къулукъчулары да аслам къошумун болдуруп геле. Ону сёзлерине гёре, алдагъы йыллардан берли, демек, коронавирус яйылып турагъан вакътидеги гьаж намазны къылывну шартларына байлавлу сакъланып турагъан гери урувлар тайдырылып, шо гьаракат алдын йимик юрюлдю. Умуми кюйде алгъанда, 11140 дагъыстанлыгъа бу йыл гьаж къылып оьзюню гьакъ борчун кютмеге имканлыкъ берилген. Къурумчулукъ якъдан да шо гьаракатны тийишли даражада оьтгермек учун бир тюрлю четимликлер де тувулунмагъан. Оланы арасындан 1 минг адам гьаж намаз къылыв борчун Россияны Федерация Советини сенатору Сулейман Керимов гёрсетеген шабагьатлы кёмекни натижасы болуп токътай. Ачыкълашдырып айтгъанда, гьар юртда ва шагьарда дегенлей яшавлукъ шартлары осал кюйде къалып турагъанлардан къайры да, Украина бойда юрюлеген асгер гьаракатда жанын къурбан этген улаанланы ата-анасы да сыйлы топуракъгъа тегин гьаж намаз къылмагъа йиберилди.
Оьзюню гезигинде Болат Къурбанов Сауд-Арабыстангъа бизин якълылыланы гьаж намаз къылмагъа йибермек учун айрыча къастлыгъын гёрсетип, болушлукъ этеген ДР-ни милли политикагъа ва дин масъалалагъа къарайгъан министрлигини къуллукъчуларына оьзюню разилигин билдирди. Шону булан биррге, бизин республикадан гьаж къылмагъа барагъанлагъа барысы да тыш пачалыкъны дазуларырыне оьтмеге ихтияр береген визалары токъташдырылгъан болжалларда тапшурулгъан. Тек оланы арасында Сауд-Арабыстанны гьакимлик къурумларыны янындан виза берив гери урулгъанлар да болду. Алдагъы йылларда шо бир де болгъан иш тюгюл. Шону себеплери гьалиге белгисиз къала. Россиягъа байлавлу гери урувлар сакъланагъангъа гёре Сауд-Арабыстангъа гьаж къылагъанланы етишдирмек учун тыш пачалыкъларда иш гёреген авиакомпанияланы имканлыкълары булан пайдаланмагъа тюшген. Гьаж намаз къылагъанланы къонакъ уьйлеге ерлешдирив, олай да гьар гюн сайын тувулунагъан гиччи масъалалар ерли къуумланы жаваплы къуллукъчуларыны болушлукъ этиливю булан артгъа салынмайлы чечилип тургъан.