Коронавирус пысгъып янагъан от йимик, астаракъ бар ерин билдирип, унутма къоймай тура. Тюзю, шону алдын алма къарайгъан гьаракатлар да юрюлмей тюгюл. Тек не буса да, халкъны оьзюню къара торундан чыкъмагъа къойма сюймей.
Алдагъы гюнлерде Дагъыстанны савлукъ сакълав министри Татьяна Беляева коронавирусдан сонг аврувлар оьрчюкмес учун къаршы иш гёрювню агьамияты барны гьакъында айтды.
– Бизин республикада эпидемиология гьаллар алдан эсе къолайлашгъан демеге ярай. Шо да бу йылны башында медицина къуллукъчуланы ва жамиятны гьаракаты булан бир кюйге гелген. Айтагъаным, жамият, айрокъда уллу чагъындагъы адамлар гьаракатын гючлендирип вакцина этме башладылар, – деп эсгерди министр. – Тек алдагъы йыллар булан тенглешдиргенде, авруйгъанланы санаву шайлы ёрукъгъа тюшген буса да, гьали де коронавирус инфекциядан оьлегенлер де бар. Неге тюгюл, бу намарт аврув уллу чагъындагъылагъа, узакъ аврувлары булангъылагъа бек гюч эте. Олагъа шу инжив аврувну гётермеге оьтесиз къыйын бола. Мисал учун, бираз алда лабораторияларда белгилеген кюйде, бизин республикада коронавирусну янгы тайпасындан 12 адам гечинген.
Гьали гьар кимни вакцина этмеге имканлыкълары бар. Грипге ва коронавирусгъа къаршы вакциналаны бир вакътини ичинде этмеге де ярай. Шону пайдасы дагъы да артыкъ болажакъ. Неге десегиз, пневмониядан бир-бир аврувлар оьрчюгюп гете, шолай къыйынлы гьаллардан оьтмеге енгил болажакъ.
Айрокъда уллу чагъындагъы адамлагъа уьюнде оьзлер сюйген кюйде аврувун бакъмагъа ярамай. Къаркъарасыны иссилиги 38,5-ден оьрге гётерилсе, уьйге врачны чакъырыгъыз. Сизге къатнагъан коронавирус дюрмю яда тюгюлмю, шону токъташдырып, врач гёрсетген, язгъан дарманланы этмеге герек. Докторну насигьатларына тергев бермеге тарыкъ. Грипден, коронавирусдан вакцина этдиривден баш къачырмагъыз. Оьзюгюзню де, доскъардашыгъызны да эсен-аман сакълагъыз!–деп билдирди Дагъыстанны савлукъ сакълав министри Татьяна Беляева.
