Артдагъы гюнлерде Бабаюрт районну Адил Янгыюртундагъы Д. Закарьяевни атындагъы орта школада жыйын оьтгерилди. Шо жыйында Ваха Асхабовну анасына игитни атына гелген Къоччакълыкъны ордени тапшурулду.
Гетген йыл август айда, Украина булангъы дазу бойда юрюлеген хас асгер гьаракатыны ортакъчысы адилянгыюртлу Ваха Асхабов миллетчилер булангъы ябушувда къоччакъ кюйде жанын къурбан этди.
Ваха Висирсолтанович Асхабов Адил Янгыюртда тувгъан, яшагъан ва юрт школаны да охуп битдирген. Сонггъу йылларда да ол оьзюн загьмат булан къуршагъан.
2023- нчю йылны февраль айыны башында 36 йыллыкъ Ваха Асхабов Россияны оборона министерлиги булан гёнгюллю кюйде дыгъар байлай ва бизин дазуланы украинли миллетчилерден якъламакъ учун юрюлеген хас асгер гьаракатгъа къуршала. Шо йылны август айыны ахырында дав тапшурувну кютегенде ол авур яраланып, къоччакъ кюйде жанын къурбан этген ва ата юртундагъы къабурларда гёмюлген.
Россия Федерацияны Президенти Владимир Путинни Указына гёре, Ваха Асхабов хас асгер гьаракатда герсетген игитлиги саялы Къоччакъ-лыкъны ордени булан оьлген сонг савгъатлангъан. Жыйынгъа Ваханы анасы Нюрпат Асхабова, ону къардашлары, ювукълары, ерли гьакимлигини вакиллери, юртлулары, муаллимлери ва школаны охувчулары гелген эдилер.
Нюрпат Асхабовагъа уланы Ваха лайыкълы болгъан Къоччакълыкъны орденин Бабаюрт районну комиссары Даниял Дибиров тапшура туруп, юртлу игитни эсгермеге гелгенлеге разилигин билдирди. Ваха Асхабовну, олай да юртдан гетген къоччакъ уланланы хас асгер гьаракатны барышында гёрсетген игитликлерин эсде сакъламакъны ва яш наслугъа олардан уьлгю алма герекни айтды.
Жыйында Адил Янгыюртдагъы орта школаны директору Ризван Оьлмесов игитни анасына ва къардашларына къайгъырышды.
«Биз Ваха Асхабовну инамлы къурдаш, къоркъув билмейген улан кюйде эсибизде сакълажакъбыз. Ону ватандаш борчун кютегенде гёрсетген игитлиги ва берилген пачалыкъ савгъаты къоччакълыгъыны ва ватангъа аминлигини белгиси болуп, янгыз ону къардашларына тюгюл, бизин районну халкъына ва оьсюп гелеген яш наслугъа да даимге уьлгю болуп токътажакъгъа шеклик ёкъ», – деди Ризван Оьлмесов.
Жыйынны ахырында Ваха Асхабовну эсделигине минутлукъ шыплыкъ билдирилди.
Герейхан ГЬАЖИЕВ,
оьз мухбирибиз.
СУРАТДА: жыйынны ортакъчылары.
