Июль айны 22-нде  гечортада  Магьачкъалада  оьзюнде къоркъунч—лу оюнлар оьтгерилеген   уьйлеге от тюшген. Натижада эки жагьил къатынгиши оьлген. 20 йыллыкъ жагьил адам къаркъарасы  бишип азарханагъа тюшген.

Сонг токъташдырылгъан  кюйде, Сайит ва 19 йыллыкъ Асият уьйленип арадан бир жума оьтгенде, шо гечеги клубгъа бармагъа сюйген. Оьзлер булан Асиятны къурдашы Мадинаны да чакъыргъан. Бензин тёгюлюп, яйылып,  уьйню ичи яллама башлагъанда, оюнну шартларына гёре къатынгишилер шанжаллагъа байлангъан болгъан. Сайит къатынын ва ону къурдашын къутгъарма къарагъан, тек бажармагъан. Оюнну юрютеген Шамил Исбагиев къачып къутулгъан.

Огъар къаршы уголовный иш ачылгъан, суд буса эки айгъа эркинликден магьрюм этмек деген  къарарны чыгъаргъан. От сёндюрювчюлени де ол чакъырма алгъасамагъан,  хоншудагъылар терезелерден  гелеген тютюнню гёрюп, шоссагьат къорувчулагъа  зенг этгенлер. Лап да тамаша ери, Ш.Исбагиев Магьачкъаладагъы от сёндюрювчюлени гьазирлейген коллежде охуй.

Ахтарывлар узатылып тура.

Алав Алиев.