Дагъыстанны маданият министерлиги, республиканы халкъ яратывчулугъуну уью Хумторкъали район администрация булан бирликде Къоркъмаскъалада яшланы яратывчулугъуну байрамын он алтынчы тирет оьтгерген. Мундагъы маданият центргъа районну бары да юртларындан оьзлени пагьмуларын яхшы яндан гёрсетген яратывчу коллективлер жыйылгъан.

 

Байрамны ачылывунда районну администрациясыны вакиллери яш пагьмуланы байрам булан къутлагъан. Булай байрамлар яшланы пагьмуларын ачмагъа, оьзлени бажарывлугъун гёрсетмеге кёмек этегенни, энниден сонг да районда арты уьзюлмей шулай гьаракатлар оьтгерилежекни айтгъан.

«Энемжая» аты булангъы байрамда оьсюп гелеген яш наслуну  халкъ яратывчулугъун билмеге, ата-бабаларыбыз бизге къоюп гетген адатланы, къылыкъланы яхшы англама, уьйренме, агьлюге, элине, ватанына, милли маданиятына сюювню артдырмагъа кёмек этежеги гьакъда эсгерилген.

Байрамны ортакъчылары Ватангъа багъышлангъан шиъруланы охугъан, гитара, агъачкъомуз согъуп йырлар айтгъан. Яшлар бийиген къурч бийивлер буса жыйылгъанланы харс урувларын къазангъан.

Байрамда ортакъчылыкъ этгенлеге дипломлар, гьар тюрлю савгъатлар тапшурулгъан.

 

Я. БИЙБОЛАТОВ

СУРАТДА: Байрамны ортакъчылары.