Алдагъы гюнлерде Бютюнроссия илму-техника яратывчулугъуну конкурсуну финал тиретини гьасиллери чыгъарылгъан.
Буйнакск районну билим берив управлениесини Telegram-каналында берилген маълуматда айтылагъангъа гёре, шо конкурсну алдынлыларыны арасында Магьаммат Абукъаев ва Магьамматкамил Къайибов да бар. Олар Оьр Къазанышдагъы бир номерли орта школаны янында иш гёреген пагьмулу яшланы «Радиотехника» деген бирлешивюне юрюй. Конкурсгъа оланы Россияны билим беривюню отличниги Абзайдин Багьавутдинов гьазирлеген.
Биз де эсгерилген конкурсну алдынлыларын гьакъ юрекден къутлай туруп, олагъа яратывчулукъ гьаракатында ва билим алывда гележекде де оьрлюклер ёрайбыз.
Насрулла БАЙБОЛАТОВ.
