Магьачкъалада ерлешген А. Тахо-Години атындагъы милли музей Бютюнроссия проектни яшавгъа чыгъара туруп, Россияны уллу оьлчевдеги музейлерини ёлбашчыларын къаршылагъан. Олагъа музейдеги экспонатланы гёрсетген ва гьарисине англатывлар берип, соравларына жаваплар къайтарып, къонакъланы разилигин алгъан.
Музейни залларында къонакълагъа Дагъыстанны театрларыны актёрлары къысгъа спектакллер гёрсетген. Олар спектакллеге къарай туруп, республикада яшайгъан гьар миллетни тарихи, маданияты булан таныш болгъан. Музейни абзарында буса дагъыстанлы усталар этген алатланы выставкасы болгъан. Онда къонакълар ямучу, папах, гьюрбеч, керамикадан, гюмюшден этилген алатлар, унцукульну, кубачини усталары этген алатланы сатып алма болгъанлар. Къонакълар Дагъыстанны оьзге музейлеринде де болажакъ.
«Россияны гьар тюрлю регионларындан гелген къонакъларыбыз Дагъыстанны табиатыны гёзеллигин гёрме болажакъ, мунда яшайгъан миллетлени тарихи, адатлары, яшав-туруш гьаллары булан таныш болажакъ ва уьлкебизни ватандашларына да билдирме кюй табажакъ. Шону булан бирче бизге гелеген туристлени санаву да артажакъ», – деген музейни генеральный директору Пахрутдин Магьамматов.
Я. БИЙДУЛЛАЕВ
