Артдагъы йылларда бизин уьлкебизде гьар тюрлю тармакъларда пачалыкъны, халкъны ва оьз пайдаларын якълап борчларына бажарывлу ва намуслу кюйде янашагъан далапчыланы гьюрметине байрам гюнлер токъташдырылгъан ва шатлыкъ агьвалатлар гьисапда оьтгериле.

Россияда далапчылыкъны байрам гюнюн оьтгерив артда чыкъгъан байрамларыбызны бириси 2007-нчи йылдан тутуп май айны ахырынчы  къаттыгюнюнде  белгиленген.

Далапчылыкъны имканлыкълары башгъа-башгъа. Уллу ва увакъ далапчылыкъ булан машгъул болагъан адамлар, къурумлар болсун, олар барысы да пачалыкъны экономикасын беклешдиривге лайыкълы къошумун болдура. Шолайлыкъда, гьар тюрлю къуллукълар ва маллар къоллавчуланы талапларын гьисапгъа алып къолайлаша ва камиллеше. Адамлар учун янгы иш ерлер ачыла, гьар тюрлю оьлчевдеги бюджетлеге тюшеген налог гелимлер арта.

Касбу байрамында лап да лайыкълы далапчы тайпалар белгилене, оланы материал ва ругь якъдан иштагьландырылагъаны да давам этилине. Шондан пайдаланып, бизге де борчларына намуслу кюйде янашагъан далапчылагъа оьз ишинде гележекде де уьстюнлюклер, савлукъ булан аманлыкъ ёрамакъ къала.

Гертиден де, уьстде де эсгерилгени йимик, уллу производствосу булангъы юрт хозяйство ва промышленный предприятиелер булан янаша базар экономиканы шартларында  далапчылыкъ булан машгъул болагъан кёп къадардагъы увакъ хозяйстволар йыл сайын­ кёп бола барагъаны тергевню тарта. Озокъда, гьалиги заманда «Экономиканы ачыкълыгъы учун» деген пачалыкъ проектни оьлчевюнде токъташдырылгъан талапланы гьисапгъа алып оланы санавун толу кюйде аянлашдырывгъа да айрыча тергев бакъдырыла.

Белгили болгъаны йимик, бизин республикабызда оьз имканлыкъларын къоллап, къолдан чыгъармай далапчылыкъ булан машгъул болагъан  323 минг адам налог къурумларда гьисапгъа алынгъан. Дагъыс­танны далапчылыкъ ва инвестиция агентлигини башчысы Гьусейн Гьусейнов бугюнлерде айрыча иш гёреген далапчылыкъ булан машгъул болагъан тайпаланы налоглар тёлевде бюджетлеге этилинеген къошуму гьакъда баянлыкъ берген.

– Далапчылыкъ булан машгъул болагъан айрыча адамланы санавун ва олар не йимик къуллукълар этив, маллар чыгъарыв булан машгъул болагъанын токъташдырыв агьамиятлы масъала санала, – деген Гьусейн Гьайбуллаевич. – Оьтген йыл увакъ далапчылыкъ тармакъда ишлейгенлерден 2 миллиард манатгъа ювукъ налоглар жыйылгъан.  Шо да алдагъы йыл булан тенглешдиргенде 15 процентге кёп болгъан…

 

Къ. КЪАЗАКЪМУРЗАЕВ.