2022-нчи йылны февраль айыны 24-ю дюнья тарихде эсде къалар гюню деме ярай. Шо гюн Донбасдагъы янгы къошулгъан республикаланы тилевюне гёре, Россия миллетчилеге къаршы хас асгер гьаракатын башлады. Гьаракатны Россияны Савутлу Гючлери юрютдю, бираздан шолагъа асгерге чакъырылгъанлар ва гёнгюллю кюйде ортакъчылыкъ этегенлер къошулду. Россияны бары да регионларындан чакъырылгъан асгерчилер оьзлеге салынгъан борчну намуслу кюйде кютелер. Шоланы арасында дагъыстанлылар да айрыча игитлик гёрсете.
Хас асгер гьаракат башлангъандан берли, Россияны Игити деген сыйлы ат 272 адамгъа берилген, шоланы экевю къумукъ уланлар экени бизин оьктем эте.
Дагъыстанлылар гёрсетген игитлиги учун мингден де артыкъ савгъатлар алгъан. Гьаракат башлангъан биринчи гюнлерден берли ортакъчылыкъ этеген эндирейли Алимпаша Жангишиевге Къоччакълыкъны орденлери эки керен берилген.
Алимпаша 1980-нчи йылда Эндирейде тувгъан. Юртдагъы школаны битдирип, хас билим алмакъ учун коллежде охуй. Асгерде ракет бёлюкде къуллукъ этген сонг, ол тюрлю-тюрлю ерлерде ишлеген. Артдагъы 12 йыл агьлюсю де булан Ростов областда яшай эди. Хас асгер гьаракат башланып бир айдан дыгъар этип, шо гьаракатда ортакъчылыкъ эте. Январ айны 15-де ону булан телефондан таба байлавлукъ тутма имканлыкъ болду. Бизин арабызда шулай лакъыр болду:
– Ассаламу алейкум, Алимпаша, Гебек сёйлеймен…
– Агъам Руслан айтгъан эди, мени булан сиз сёйлеме сюе деп…
– Башлап сени Янгы йыл булан къутлайман. Сонг да, сен 2 керен Къоччакълыкъны орденлери булан савгъатлангъанны бизин якъдагъылар билмей…
– Мен Ростов областда яшайман, кюйге къарагъанда, маълуматлар онда гетегенге ошай.
– Къоччакълыкъны ордени яхшы савгъат, сенде буса олар эки бар. Не учун берилгенни айтма яраймы, газетни охувчуларын да таныш этейим?
– Язып турма тарыкъ да тюгюлдюр… Айтардай зат да болмагъан…
– Бир зат да этмегенлеге савгъатлар бере деп эшитмегенмен… Сен асгерге дыгъар байлап гелгенден берли, бир ерде къуллукъ этемисен?
– Бу уьчюнчю ерим. Башлап мени БАРС-3 деген асгер бёлюкге салды, сонг БАРС-7 дегенине чыкъдым. Гьали Ростовну атын юрютеген 140-нчы полкдаман.
– Не чиндесен ва ким болуп къуллукъ этесен?
– Мен старший сержантман, яяв асгерде чапгъын этеген бёлюкню командиримен.
– Кёп чапгъын этме тюшеми?
– Мени бёлюгюм оьзюне салынгъан тапшурувланы толу кюйде кюте.
– Савгъатланы шолай чапгъынлардан сонг тапшургъанмы?
– Нечик буса да айтдырма сюесен… Мен башлап бир ай Запорож областдагъы дав агьвалатларда ортакъчылыкъ этдим, сонг мени Луганск бойгъа чыгъарды. Шолай бир тапшурувну кютме баргъанда, мени бёлюгюм Врубовка деген юртну боюнда къамавгъа тюшдю. Яшлар тартынмады, миллетчилер башлап биз къолгъа гелер деп тура эди ва есир этмек учун биз чыгъар деп умут этеген янгъа бары да гючюн салып токътады. Тек мен 11 адам да булан биревюлей янгъа, олар орунлашгъан, тек аз адамы къалгъан юртгъа багъып чапгъын этме токъташдым. Миллетчилер эс тапгъанча, юртну алдыкъ ва шонда беклешдик. Украинли миллетчилер 3-4 керен чапгъын этди, тек юртну алма болмады. Биз оланы дагъытдыкъ ва бирисин есир де этип, бир адамыбызны да тас этмей чыкъдыкъ. Шо давубуз учун барыбызгъа да савгъатлар берди, магъа буса орден тапшурулду…
– Гьали биревю савгъатынгны алгъан кююнгню де хабарласанг ярар эди…
– Бизин асгер бёлюк гёрсетилген бойну миллетчилерден тазалай туруп, Александровка деген юртгъа ювукълашды. Олар бизин асгерлеге яхшы къаршылыкъ билдирди, неге тюгюл бу юртну къолдан чыгъармай сакъламакъны маънасы бар эди. Александровкадан сонг Николаев деген шагьаргъа ёл ачыла. Бизин асгерлер миллетчилени дагъытды, мен башчылыкъ этеген бёлюкге буса бир ерин къоймай юртгъа салынгъан миналарын тайдырмакъ борч салынды. Бир адамымны да тас этмей, юртну къоркъунчлу атылтыв алатлардан тазаладыкъ. Бизин ишибизни къыйматлады ва магъа экинчи гезик де Къоччакълыкъны орденин тапшурду.
Бугюнлерде бизин асгер бёлюк Херсон бойда Крынки деген юртну боюнда ерлешген. Буйрукъгъа къарап турабыз… Биз мунда кёп миллет барбыз, гьарибизни оьз байрагъыбыз да бар. Эгер де биз бир ерни миллетчилерден алсакъ, шо ерге байракълар къагъабыз. Башгъалар йимик къумукъланы байрагъын мен де къагъаман…
Мен Алимпаша булан савболлаша туруп, огъар уьстюнлюкню де алып эсен-аман уьюне къайтмакъны ёрадым. Ону уьйде агьлюсю ва 4 авлети сагъынчлы кюйде гёзлеп тура.
Гебек КЪОНАКЪБИЕВ.
СУРАТДА: Алимпаша Жангишиев.
