Районну ёлбашчысы Даниял Исламов алдагъы гюнлерде хас асгер гьаракатыны ортакъчысы, яра тийген сонг гопитальда ятып, савлугъун яхшылашдырып, отпускагъа гелген Завурбек Къачетов булан ёлукъду.

З. Къачетов Украина бойда хас асгер гьаракат башлангъан гюнлеринде асгерге чакъырылгъан эди. Дав гьазирлигинден оьтген сонг ол Донбассны халкъыны азатлы­гъын миллетчилерден якъламакъ учун йибериле.

Хас дав гьаракатында ортакъчылыкъ этеген замандан берли, ол районну ёлбашчысы Даниял Исламов булан аралыкъ тутгъан ва районгъа къайтгъанда ону булан ёлукъмагъа сёз берген болгъан. Ол берген сёзюнде табылып, шолай ёлугъув да оьтгерилген.

«Мен телефондан таба сёйлейгенде, уьйге уьстюнлюкню алып гелип, сизин булан сююнчюмню бёлермен деп ойлай эдим. Амма къысмат башгъалай буюрду: магъа уьйге яраланып къайтма тюшдю. Тек Есибиз арив гёрсе, мен янгыдан асгер ёлдашларымны янына барып, берген сёзюмде табылма къастлыман», – деди З. Къачетов Даниял Исламов булангъы лакъы­рында.
Ондан къайры да, ол Даниял Исламовгъа асгерге чакъырылгъанланы уьягьлюлерине этеген кёмеги, гьай этивю саялы баракалла билдирди ва олар учун шо ишлер бек агьамиятлы экенни де эсгерди.

– Биз асгерге чакъырылгъанланы уьягьлюлерини даим янын тутуп, олагъа болагъан кёмегибизни ва арагъа чыгъа­гъан оьзге четимли масъа­лаларын чечме де къаст этебиз. Шо иш биринчи гюнлерден тутуп башлангъан. Район энниден сонг да эсгерилген уьягьлюлени яшав гьалын болгъан чакъы яхшылашдырмагъа къаст этежек, — деди, оьз гезигинде Даниял Исламов.