Дагъыстанны маданият министри Зарема Бутаева «Хрустальный источникЪ» деген яшлар чыгъарагъан киноланы экинчи фестивалында ортакъчылыкъ этип, дипломлар къазангъан дагъыстанлы яшлар булан ёлугъув оьтгерген.
«Наследие Дагестана» деген коллективни яш актёрлары Ессентуки шагьарда оьтгерилген яшлар чыгъарагъан киноланы экинчи фестивалында ортакъчылыкъ этген. Олар фестивальда «Цена любви» деген къысгъа метражлы киносун гёрсетген. Проектни чебер ёлбашчысы Наталья Забазанова ёлугъувда яшлар кинону нечик чыгъаргъаныны гьакъында хабарлагъан. «Студия 136» деген киностудия олагъа этген кёмекни гьакъында эсгерген.
Савлай уьлкебизден жыйылгъан командалар кинофестивальда алдынлы ерлеге ес болмакъ учун къаст этгенлер. Фестивальны гьасиллери чыгъарылгъан сонг дагъыстанлы яш киночулар гьар тюрлю дипломлар къазангъан.
«Бизин яш пагьмуларыбыз инчесаниятны гьар тюрлю тармакъларында чалышагъаны учун оьктем болабыз ва сююнебиз. Кино инчесаниятда яшларыбыз шулай уьстюнлюкге етишгени бизин учун уллу даража», — деген министр ва яшланы бу йылны ахырында оьтгерилежек Темиркъазыкъ-Кавказ маданият форумгъа чакъыргъан. Яшлар дагъы да «Время героев» деген кинофестивальда ортакъчылыкъ этежек. Шо фестиваль Дагъыстангъа чапгъын этген халкъара бандитлер тозулгъанлы 25 йыл битегенликге багъышлана.
«Цена любви» деген яшлар чыгъаргъан кино буса язны узагъында Даггосфилармонияны майданында гёрсетилип туражакъ.
Я. Бийболатов
СУРАТДА: министр булан ёлугъув.
