Аминат Залибекова савлукъ сакълав тармакъда 20 йыл чагъында загьмат тёкмеге башлагъан. Ол Каспийск шагьардагъы медицина къуллукъчуланы гьазирлейген училищени уьстюнлю кюйде тамамлап, гиччиден юреги авгъан касбусуна ес болгъан. Муна шо гюнден тутуп, ата юрту Мужукъайдагъы фельдшер – акушер пунктну (ФАП) заведующийи болуп белсенип чалышагъаны 35 йылгъа ювукъ бола.
Аминат 1970-нчи йылда Макидинни ва Абидатны татывлу агьлюсюнде тувгъан. Ата юртдагъы шо замангъы 8 класлыкъ школаны битдирип, охувун Бабаюртдагъы 3 номерли орта школада давам этген. 1987-нчи йылда школаны битдирип, Каспийск шагьардагъы медицина училищеге охума тюше.
Аминат гиччиден медсестра болмагъа гьасирет болгъан. Мелте чагъындан тутуп, къурчакъларына «укол» этип ойнап, акъ халат да гийип, «докътур болуп ишлеймен» деп абзарда юрюй болгъан. Хоншудагъы шагьарда медицина училищеде охуйгъан къызгъа: «Магъа укол этеген шприцлер алып гел», – деп тилей болгъан.
Аминат Залибекова – шо узакъ йылланы боюнда юреги авуп танглагъан касбусуна аминлигин сакълап, ишин къургъан асил тиштайпа. Ол загьмат ёлунда къыйынлыкълагъа чул бермей, ишинде янгыз алгъа бара.
Ишине берилген, касбусуну сырларын яхшы билеген Аминатны абуру ва сыйы юрт арада, иш ёлдашларыны арасында гюн сайын артгъан. Юртда Аминатны кёмеги тиймеген бир агьлю де къалмагъандыр деп айтсакъ да, ялгъан болмас.
– Аминат Залибекова яллыкъ билмей, арымайлы-талмайлы, гечеси-гюнюне къарамайлы, чакъыргъандокъ аврувгъа алгъасай. Ону исси иржайыву, йымышакъ къоллары, йылы сёзлери аврувну гёнгюн ача, ону ругьун гётере десем де, кёп къопдурув болмас. Аминат юртда лап да герекли адам. Ону атына юртлулар гьар гюн баракалла ва разилик билдире, – дей юртлусу Апенди Жамаев.
Аминат Залибекова ёлбашчылыкъ этеген ФАП-ны къуллукълары булан 700 адам пайдалана.
– Бизин ФАП Мужукъай ва Ягъылбай юртларда яшайгъан халкъны аврувларын багъа, – деп хабарлай Аминат Макидиновна. – Мен юртда тувгъан къызман. Бары да халкъны яхшы таныйман. Олар да мени таный. Мени юртлуларымны савлугъун къоруп сакъламагъа хыялым бар. Гьар аврувну юрегим булан сеземен. Медицина къуллукъчулар шолай болмагъа да герек деген ойну бютюнлей якълайман.
Гертиден де, Аминат ишинде айсениликге ёл бермей. Ишин тындырыкълы ва мекенли кютмеге гьазир. Оьзюню уьстюне гелген адамны къуллугъун кютмей йибермеген. Къолундан гелеген кёмегин болдургъан. Аминатгъа савлугъу осал болуп янгыз юртлулары гелип къалмай, хоншудагъы тав къотанларда яшайгъанлар да геле. Аминат оланы бир де хатирин къалдырмагъан, оьзюнден болагъан кёмегин этген.
Аминат юртлуланы арасында бир-бир аврувланы алдын алмакъ учун тийишли гьаракатланы оьтгере. Заманында тийишли болагъан чаралар гёрсе, къайсы аврувну да енгиллешдирип болагъанны медицина къуллукъчу гьисапда ол яхшы англай.
2020-нчы йылда савлай дюнья оьлчевде коронавирус аврув арагъа чыкъгъанда, Аминат гече де-гюн де дегенлей ишде болгъан. Оьзюню касбу бажарывлугъу, гьаракаты ва пагьмусу булан кёплени шо яман аврувдан къутгъаргъан десек де, гьакъыкъатгъа къыйышмай къалмай. Аминат Залибекова ишине берилгенлик жавапсыз къалмагъан. Ол кёп керенлер гьюрметлев грамоталагъа ес болгъан. Озокъда, бары да савгъатлардан огъар савлугъу къолай болгъан аврувну гьакъ юрекден айтылгъан баракалласы ва алгъышлы сёрлени ювукъ. Шолай мюгьлетлерде Аминат оьзю танглагъан ёл тюз экенге мюкюрлюк эте ва юреги сююнчден тола.
Бойнуна алгъан ишин ва борчларын даим де мекенли кюйде кютюп уьйренген Аминат агьлю яшавунда да ким де сукъланардай ожакъ къурмагъа бажаргъан. Агьлю чери Магьамматбек Залибеков булан 4 яшны оьсдюрген. Татывлу ва берекетли агьлюде оьсген эки улан Жамал ва Камал, эки къыз Женнет ва Маликат асил къылыкъда тарбиялангъан. Бугюнлерде авлетлерини авлетлери Аминатны ва агьлюсю Магьамматбекни къуванчы ва сююнчю болуп токътай. Торунларындан сююнюп яшай, оланы да асил къылыкъда ва мердешлерде тарбияламагъа къасткъыла.
Касбусуна гиччиден гьашыкъ болгъан Аминатдагъы ишине сююв гьали де сёнмеген. Загьматы булан талай тапгъан акъ халатлы «малайикге» яшавунда насипли ва къуванчлы гюнлери кёп болсун деп айта туруп, адамлагъа бек тарыкъ ва абурлу ишинде чыдамлыкъ, гюч-къуват да ёрайбыз.
Бэлла ГЬАЖИГЕЛДИЕВА,
Россияны журналистлерини союзуну члени.
