Белгили болгъаны йимик, Россияны Президенти Владимир Путинни таклифине гёре 2024-нчю йыл агьлюню йылы деп белгилеген. Шонда алгъа салынгъан аслу борч – кёп авлетлер тарбияланагъан агьлюлени гележекдеги талайлы къысматы пачалыкъны янындан тергевсюз къалмагъа тюшмей деп токъташдырылгъан.
Озокъда, яш наслубузну оьз ватанына аминликде аманлыкъны шартларында билимли этип оьсдюрюв гертиден де, бизин алдыбызда токътагъан жаваплы ва сыйлы борч. Шо ишде агьлюню школа булан байлавлукъда оьтгерилмеге герекли чаралары да аслу ерни тутмагъа тюшегени гьакъда айрыча хат булан эсгерилегени де англашыла.
Шону гьисапгъа алып, савлай уьлкебизде йимик, Дагъыстанда да ДР-ни загьмат ва яшавлукъ оьсюв министерлигини къасты булан билим берив ва савлукъ сакълав тармакъларда гьар тюрлю ёлугъувлар, конкурслар, выставкалар, ярышлар оьтгерилегени йылны башындан тутуп ачыкъ болуп гёрюне.
Бугюн бизге ер юзюнде нече тюрлю касбу-саният бары гьакъда токъташдырып айтмагъа тынч масъала тюгюл. Тезгилери булан янаша базар аралыкълар оьмюр сюреген янгы экономиканы шартларында башгъа-башгъа касбуланы санаву йылдан-йылгъа артып турса тюгюл, бир де кемимей…
Айтмагъа сюегенибиз, оьсюп гелеген яш наслулар да айлана якъда болуп турагъан тюрленивлеге гёре яшавну онгайлыкъларындан, бар имканлыкълардан артда къалмасын учун гьаракатны артдырыв агьамиятлы масъала экени гьакъда унутмагъа ярамай.
Бугюнлерде ДР-ни загьмат ва яшавлукъ оьсюв министерлигини сиптечилиги булан Избербаш шагьардагъы адамланы ишге къуршав масъалалар булан машгъул болагъан къуллугъу «Выпускник-2024» деген сиптени якълап иш гёре. Ерли школаланы педагогика коллективлери ва ата-аналаны комитетлери булан байлавлукъда охувчуланы арасында оланы гележегин гёз алгъа тутуп касбу танглавгъа байлавлу болуп клас сагьатлар оьтгерип тура.
– Клас сагьатлар бизин уьлкебиз, республикабыз, шагьарыбыз ва Къаягент районубуз учун лап да тарыкълы касбуланы танглавгъа байлавлу болуп оьтгериле,– дей Избербаш шагьар округуну башчысыны орунбасары Нариман Рабаданов. – «Касбу танглав» деген темагъа гёре клас сагьатланы оьтгеривде шагьардагъы 2 ва 11 номерли орта билим берив школаларда англатыв ишлер къурумлу кюйде салынгъаны гьакъда айрыча разилик булан эсгермеге сюер эдим.
КЪ. КЪАЗАКЪМУРЗАЕВ.
