Адил Бийтемиров Хасавюрт районну бырынгъы Яхсай юртунда тувгъан. Шиърулар язма геч башласа да, гьалиге ерли алты шиъру китапны автору. Гьар тюрлю юртларда охувчулар булан ёлугъувларда бола. Украина бойда юрюлеген гьаракатны ортакъчыларыны гьакъында кёп яза. Ону шиъруларыны бир бёлюгюн тувгъанлы 70 йыллыгъына багъышлап охувчуланы тергевюне беребиз.
Донбасдагъы яшлагъа
Россиягъа къалгъанмы бар намуслар,
Зар эллени аманлыгъын сакълама.
Эркинликни бувма чаба бу наслар,
Гьар элни де рагьатлыгъын якъламай.
Ким тура эди давлардан сонг явлагъа
Бу девюрде бизин яшлар чыгъар деп?
Нацистлени ажырыгъын къырмагъа,
Къоччакъ эрлер савутларын тагъар деп?
Донбас элде ругьун сынай къумукълар,
Аманлыгъын Аллагь оьзю сакъласын.
Уьлгю олар, гележеги ярыкълар,
Яратгъаным умутларын якъласын.
Донбас бойда тавакаллы уланлар
Ягьын-ругьун къумукъ намус якъгъангъа.
Арасында яхсайлылар аз-тюгюл,
Къаршы тура намарт болуп чыкъгъангъа.
Яшлар сизге алгъышыбыз – дуалар,
Гьайкел бизден салаватлар салагъан.
Насип болсун эсен-аман къайтмагъа,
Къыйматланып, Тангчолпандай янагъан.
Уьйден чыкъса
Уьйден чыкъса улан, уьрке , аналар
Булут баса юзюн, оьзю бюкленип.
Явгъа гетсе, от-ялында яналар,
Къайтгъанчагъа гёзлер къыргъа тикленип.
Аталар да сыр билдирмей, ичинден,
Дерт-тююнню гёрсетмейли гюелер.
Чыдай чартлап намус-ягьны гючюнден,
Авлетлени къоччакълыгъын сюелер.
Тенг этебиз, дав бойдагъы яшланы,
Асхартавгъа, Анадолгъа, Чолпангъа.
Аналардан тёгюлген гёзъяшланы
Алгъышлардай гюч береген Ватангъа.
Аналаны жан уруву – умутлар,
Жан сав чакъы, тапгъанларын излейген.
Лап да гючлю ер юзюнде – Аналар!
Авлетлерин гёзюн юммай гёзлейген.
Къайтар яшланы
(Йыр)
1.
Оьжетли давда, Украинада
Жан берген яшы – Ана не гьалда?!
Ата айырмай , гёзлерин ёлдан
Сынташын сыйпап, чанг таймай къолдан
припев:
Яратгъан Аллагь!
Ая Ананы.
Къара гийдирмей,
Къайтар яшланы.
Тенгирим, тилев!
Ойла Ананы.
Жанын гюйдюрмей,
Токътат давланы.
2.
Гьар давну агьы – туздай ярагъа,
Оьчлюкню оту гирсе арагъа.
Сав оьмюр жанын зарлыкъда къоймай,
Тенгирим, къайтар яшын Анагъа!
припев:
3.
Сюеми давну, сора Анагъа.
Алгъышы айтар – дослукъ дюньягъа.
Къудратым къайтар, учгъан къушланы
Яшланы ойлап, токътат давланы!
припев:
Тилсиз жан да талчыгъа
Анжиге бармагъа деп,
Онгарылып тураман.
Бирденден тавуш чыкъды,
Сесгендирип, бир яман.
Торун пакъыр тарлана,
Оьзю къарап оьсдюрген.
Акътёш бойнундан бувуп,
Арив къушун оьлтюрген.
Къайтгъанда чыкъдым бавгъа,
Аштархан тавукъ «чарнай».
Бир мюгьлет де токътамай,
Сайки адамдай йылай.
Йыламаймы яндашы
Бир мюгьлетден ёкъ болса?
Ич-бавуру ярылып,
Амалсыз янгыз къалса.
Уьстевюне, жан берсе,
Уьстюне чабып, асны.
Сабур сёзлер айтсанг да,
Токътатып болмас «ясны».
Токътамай тавушу да,
Сайки ону чакъыра.
Къарап языкъ гьалына,
Дертли ойлар янгыра.
Ашгъа-сувгъа къарамай,
Гьалек ичинде бавну.
Тамагъы да къарлыгъып,
Сала эсге о давну.
Къарагъыз аминликге,
Бу къушдагъы тюзлюкге
Гьазир жанын бермеге,
Гьасиретлик гёрмеге.
Ёлдашына ёл тапмай,
Чыкъмагъа тура юрек.
Олай къайгъы кёк урса,
Тюбюнден къуруй терек.
Авлетинден айрылгъан,
Савунда авлет гёмген,
Сюексиз яслар этген,
Ана не болма герек?!
* * *
Англагъыз! Яманлыкъдан,
Гьассиликден, «жан чыгъа».
Дюньяда давлар болса,
Тилсиз жан да талчыгъа.
