Бабаюртлу Завур Къазбековну уланы Абакар бугюн хоккей оюндан оьзюню тенглилерини арасында лап да пагьмулусу деп санала. Ол дыгъар байлагъан «London Nice» деген хоккей клуб – Канаданы лап да белгили командаларыны бириси. Шо клубгъа чыкъмакъ учун Абакар Къазбеков гьар тюрлю сынавлардан оьтмеге борчлу болгъан. Сынавлардан уьстюнлю кюйде оьтген сонг, клубну вакиллери 18 йыллыкъ хоккеист булан дыгъар байламагъа токъташгъан.
Абакар Къазбековну спорт ёлу Подольк шагьардагъы «Витязь-2004» деген хоккей командада башлангъан. Ол шонда да хоккей оюндан йылдан-йылгъа оьзюню пагьмусун артдыргъан, клубну, сонг буса савлай дивизионну лап да гючлю чапгъынчысы деген атгъа лайыкълы болгъан. 2016-нчы йылда Бютюнроссия оюнларында ону командасы алдынлы ерге ес бола, Абакаргъа буса оьтгерилген оюнларда лап да кёп гол гийирген оюнчу гьисапда хас кубок тапшурулгъан.
Абакар Къазбеков 2019-2020-нчы йылларда 16 йыллыкъ хоккейистлер ойнайгъан ярышларда ортакъчылыкъ этген. Шо йыл командасы булан ол 21 оюн оьтгерген ва шоларда 4 гол гийирген ва 12 очко къазангъан. Сонг Лондонну хоккей клубу булан дыгъар байлагъаны да шо йыл Абакар Къазбековну яхшы оюнун исбатлай.
Бугюн Абакар «London Nice» деген хоккей клубда ойнай. Ол – оьзюню командасыны гёрмекли чапгъынчысы. Команданы гьар уьстюнлюгюне ол оьзюню къошумун эте.
Абакар – тутушуп ябушувдан дюньяны кубогун къазангъан спортну халкъара даражалы устасы бабаюртлу Завур Къазбековну уланы. Абакарны уллатасы Гьажи Къазбеков да – районда танывлу адам. Ол узакъ йыллар Бабаюртдагъы яшланы спорт школасыны ёлбашчысы болуп тургъан, районда спортну яйылывуна тенгсиз къошум этген.
Биз де, Абакарны спортда етишген уьстюнлюклери булан къутлай туруп, савлукъ, насип ва дагъы да оьрлюклеге етмекни ёрайбыз.
СУРАТДА:
Абакар КЪАЗБЕКОВ.