Бизин эревюллю уланларыбызны Украина булангъы дазуда юрюлеген хас дав гьаракатдагъы ишлери гьакъда гелеген сююнч хабарланы арасындагъы аччы хабар адильянгыюртлуланы чы нечик де, савлай районну халкъыны юреклерин де ачытдырды, къайгъыгъа ва пашманлыкъгъа салды.
Гьали – гьалилерде юртгъа къысгъа болжаллыкъ отпускагъа гелип гетген хас дав гьаракатны ортакъчысы Артур Вазирханович Садуллаев бизин арабыздан о дюньягъа гёчдю.
Бабаюрт районну ёлбашчысы Даниял Исламов ону ата-анасына къайгъырышды.
«Гьюрметли Вазирхан Жалалович ва Маккахан Салавовна, агьлюсю Женнет Шахсолтановна, авлетлери, ювукъ адамлары, дос къардашлары! Сизин уланыгъыз, уьлгюлю агьлюню башы ва яшланы атасы Артур Ватаны учун къоччакъ кюйде жан берген. Шолай авлетни, элини герти патриотун оьсдюрюп тарбиялагъаныгъыз саялы гьакъ юрекден сизге баракалла билдиремен. Бугюн район булан бирге савлай Дагъыстанны халкъы да къайгъыра. О — бизин ортакъ къайгъыбыз. Артурну ярыкъ келпети бизин эсибизде даимге къалажакъ, Аллагь сизин юреклеригизге маслагьат салма, гюч-къуват берсин!» деп билдирген, Даниял Пашаевич.
Адил Янгыюрт юрт советини депутаты 40 йыллыкъ А. Садуллаев, оьрюм чагъына етишмеге 3 яшы барына да къарамай, оьтген 2022-нчи йылда башлангъан мобилизациягъа тюшген сонг, хас дав гьаракатда ортакъчылыкъ этме гетген эди. Ол герти патриот кюйде Ватангъа берген антына, халкъыны азатлыгъы учун ахыр тынышына ерли амин къалды.
Оьр командование берген дав тапшурувланы кютювде гёрсетген къоччакълыгъы ва игитлиги саялы огъар «Къоччакълыгъы учун» деген 2-нчи даражалы медаль ва болжалы етишгенче лейтенант ат берилген эди. Душмангъа чапгъын этеген взводну командири Артургъа, пагонланы ва савгъатны алмагъа чакъы заман етишмеди, дав тапшурувну кютеген вакътиде ону машини минагъа рас болуп ёлда атылгъан. Хас дав гьаракатда гёрсетген ва асгер гьаракатда этген къошуму учун ол, оьлген сонг пачалыкъ савгъаты — Къоччакълыкъ орденге гёрсетилген.
А. Садуллаев булан бирге Ватан борчун кютеген дав ёлдашлары: «Ол къоркъувну билмейген солдат, къоччакъ ва игит командир эди. Биз герти къурдашыбызны, уллу агъабызны тас этдик», — деп эсгерелер.
Игит улан Артур Садуллаев ата юрту Адил Янгыюртдагъы къабурларда гёмюлдю.
Игит атынг юреклерде яшажакъ
Ягъаланы басып явлар гелгенде,
Савут тутуп чапдынг, сёгюп санынгны,
Артур, иним, амин болуп антынга,
Ватан учун къурбан этдинг жанынгны.
Илбис булан ябушдунг сен бетге-бет,
Тюшмединг сен ёлгъа гери къайтагъан,
Урушларда эркинлигин якъладынг
Азиз ерни, биз «Ватан» деп айтагъан.
Душман булан тогъа тартып, сан сёгюп,
Кюлетмединг артгъа къачып ятынгны.
Яш наслугъа уьлгю болуп савунгда,
Язып къойдунг тарихлеге атынгны.
Балкъып чыкъгъан гюнюнг батып ят элде,
Къумукъ халкъым эр уланын тас этди.
Ана топуракъ аяп алды къарнына,
Ана Ватан оьлюмюнге яс этди.
Эр намуслу этип тарбиялагъан
Алгъыш болсун сени ата-ананга!
Игит атынг юреклерде яшажакъ,
Юлдуз болуп, гече кёкде янагъан.
Герейхан ГЬАЖИЕВ,
бизин мухбирибиз.
СУРАТДА: Артур Садуллаев
