Артдагъы гюнлерде хас асгер гьаракатда къоччакъ кюйде жанын берген уцумуюртлу Шамил Ибрагьимов, командованиени тапшурувларын кютеген вакътиде гёрсетген игитлиги учун, оьлген сонг Къоччакълыкъны ордени булан савгъатланды. Савгъатны игитни агьлюсю Найидагъа районну асгер комиссары Даниял Дибиров ва районну башыны орнунбасары Илмидин Абдуразакъов тапшурду.

Савгъатны тапшура туруп, Д. Дибиров Шамилни игитлиги гьакъында гьакъылбалыкъ болмагъан 6 яшны да къоюп, Ватаныбызны миллетчилерден къоруп сакъламакъ муратда гёнгюллю кюйде хас асгер гьаракатгъа гетгенин де, ону къоччакълыгъын да суратлап айтды.

«Шамил Ватаныбызны алдындагъы борчун герти патриот кюйде кютдю, ахырына ерли берген антына амин болду. Ол халкъыбызны юрегинден бир де таймажакъ. Ону игитлиги оьсюп гелеген яш наслугъа уьлгю болуп токътажакъ», — деди Даниял Дибиров.

Илмидин Абдуразакъов Шамилни гьакъында айта туруп, ол герти патриот ва уьлгюлю ата болуп оьзюн гёрсетме бажаргъанын эсгерди. «Ол оьзюню аявлу яшавун къызгъанмай, алдына бир мурат салып, парахатлыкъны якълап ва шо ёлну тутуп, ахыр тынышына ерли Ватангъа берген антына амин болгъан. Биз ону бир заманда да унутмажакъбыз, тарыкъда сизин яныгъызда болмагъа къаст этежекбиз», — деди ол.

Оьз гезигинде Найида Ибрагьимова районну ёлбашчыларыны гьай этивю саялы ва агьлюсюне, оьзлени атына айтылгъан исси сёзлер учун гелген къонакълагъа баракалла билдирди.

 

Герейхан ГЬАЖИЕВ,

оьз мухбирибиз.

 

СУРАТДА: Найида Ибрагьимовагъа савгъатны тапшурагъан вакъти