Адил янгыюртлу Марат Гьажиев, Украина булангъы бойда юрюлеген хас асгер гьаракатда Ватанын якълавда гёрсетген къоччакълыгъы ва игитлиги учун, Россия Федерацияны Президенти
Владимир Путинни Указына гёре, «Къоччакълыгъы учун» деген II даражалы медаль булан савгъатлангъан.

Оьзюне 23 йыл болагъан Марат Ватан борчун кютюп 2022-нчи йылны июн айында уьюне
къайтгъан эди. Август айда ол сюеген къызы булан уьйленип, янгы агьлю яшавгъа абат ала.
Россия Федерацияны Президенти Владимир Путинни Указына гёре оьтгерилген мобилизациягъа тюше. Марат бир де ойлашмай, элини, халкъыны азатлыгъы учун, уьйде яш агьлюсюн де къоюп, хас асгер гьаракатда ортакъчылыкъ этмеге гете.
Башлап ол Владикавказда гьазирлигинден оьтген сонг, ёлдашлары да булан алдынлы асгер
бёлюкге йибериле. Бугюнге ерли Марат миллетчилерден уьстюн геливюбюзге оьз къошумун этип, асгер борчун лайыкълы кюйде кюте.
Маратны гьакъындан мен къырдан эшитип билмегенмен. Районну халкъындан Запорож областындагъы асгер борчун кютегенлеге гуманитар кёмегин алып баргъанда, ол биринчилерден болуп, посылкаланы тийишли ерлеге, гьатта ювукъ дазу аралыкъда ерлешген алдынлы асгер бёлюклеге етишдирмек учун гьай этип айланды.
М. Гьажиев — машин гьайдавчу. Ол оьзюню «темир» къурдашы да булан бизин асгерчилеге дав
савутлар ва къураллар ташый. Маратны чалтлыгъындан, ишине берилгенлигинден ва бажарывлулугъундан кёп зат гьасил бола, айрокъда заманында етишген дав савутлар ва къураллар душманны савутун ва яяв асгерин дагъытывгъа, янгы топуракъланы азат этивге имканлыкъ бере.
Шолай, бизин тюнегюн юртларыбызны орамларында чабыпойнап юрюген яшларыбыз, бугюнлерде герти къоччакъ ва игит наслугъа айланып, Ватаныбызны якълай. Марат ва ону йимик нече-нече, элине къоркъунчлукъ тувгъанда, «гьайт» дегенде даим де алсыдыраларда душмангъа къаршы
турма болагъан уланларыбыз бар чакъы, Ватаныбыз герти якълавчуланы къолунда десек, дурус болар.
Герейхан Гьажиев