Россияны янгы къошулгъан регионларын миллетчилерден ва иблислерден якъламакъ мурат булан башлангъан хас асгер гьаракатда 2022-нчи йылдан берли ортакъчылыкъ этеген, инженер асгерлени давгъа гьазирлевде ва гьюнерли юрютювде гёрсетген бажарывлугъу учун, Адил Янгыюртлу Элдар Сапаевни асгер бёлюкню командири генерал-майор С. Медведев Россия Федерацияны оборона Министерлигини «Инженер тапшурувланы кютювдеги къастлыгъы учун» деген медалы булан савгъатлагъан.
Элдар артдагъы 20 йылны боюнда Ватанны харлысызлыгъын инамлы, гьалал ва къоччакъ кюйде якълай геле. Муна Украина бойдагъы хас асгер гьаракат башлангъанлы да ол алдынлы асгер сыдыраларда Запорож областда сапёр ротада къуллукъ эте. Демек, ол россиялы асгерлени алгъа юрюшюн миллетчилени миналарындан ва оьзге тюрлю атылтыв алатларындан сакълап, олагъа къоркъунчсуз ёл ача.
Элдарны бу савгъаты бешинчиси болуп токътай. Эрте заманда да ол, Украинаны савутсузландырывда гёрсетген игитлиги учун Жуковну, «Къоччакълыгъы учун», асгер бёлюкню командирини янындан «Давдагъы айрыча уьстюнлюгю учун», ондан къайры да хас асгер гьаракатда оьзюню усталыгъы ва оьр натижалары саялы, Россия Федерацияны Оборона Министрлигини янындан да «Уьстюнлюгю саялы» деген медаллар булан савгъатлангъан.
Белгили болгъаны йимик, хас асгер гьаракатында бизин райондан 300-ден де артыкъ асгерчи тапшурувланы кюте. Оланы кёбюсю орденлеге ва медаллагъа лайыкълы болгъан.
Герейхан ГЬАЖИЕВ.
СУРАТДА: Элдар САПАЕВ.
