Сонг да, Азнавур Гьажиев ва Биярслан Изиев оьз янындан Уллу Ватан давда оьлгенлени эсделигине Бабаюртда къурулажакъ эсделик комплексге кёмек къолун узатажакъны билдирдилер.
Азнавур Гьажиев оьзюню иш сапарын Бабаюрт район администрацияны бинасында халкъны къабул этив булан узатды. Шо гюн министр булан ёлукъмагъа районну юртларындан хыйлы адам гелген эди. Олар министрни алдында оьзлени ва районну масъалаларын гётердилер.
Бабаюрт жамиятны бир бёлюгю буса Азнавур Гьажиевни алдында районну жамиятын талчыкъдырагъан гёчювюл гьайванчылыкъны топуракъларын белгилемек учун республикада юрюлюп турагъан ишлени эсгердилер. Белгили кюйде, Дагъыстанны Башчысы оьзюню Чакъырывунда гючювюл гьайванчылыкъ булан машгъул тав районланы санавсуз-сансыз къотанларыны масъаласын закон якъдан бир эпге гелтирмеге герекни эсгерген эди. Рамазан Абдулатиповну шо сёйлевюнден сонг бабаюртлулар оьзлеге ер тапма болмай турагъаны да англашыла. Неге тюгюл де, бугюн Бабаюрт районну топурагъында ерлешген 190-дан да къолай тезден юртлагъа айлангъан къотанланы халкъыны санаву районну миналы къумукъ ва ногъай халкъларыны санавундан да артыкъ. Эгер тангала шо къотанланы Бабаюрт районгъа къошса, «гелгинчилени» санаву ерли халкъдан 2 керенге сама да артыкъ болуп токътажакъ. Гьакъыкъатда Дагъыстанны картасындан даимге бирдагъы бир къумукъ район таймакълыкъ бар.
Дагъыстанны печатгъа къарайгъан министри Азнавур Гьажиев булан ёлугъувда бабаюртлулар дагъы оьзге масъалаланы да гётерди. Оланы барысына да министр тындырыкълы кюйде жаваплар берди ва районлуланы къыйнайгъан авур масъалаланы чечмек учун оьзюню бары да гючюн салажакъны билдирди.
Халкъны къабул этип битген сонг, Азнавур Гьажиев «Бабаюртну янгылыкълары» деген район газетни редакциясында да болду. Министр редакцияны къуллукъчулары булан таныш бола туруп, оланы соравларына жаваплар къайтарды, таклифлер берди.
Бу йылны апрель айында Бабаюрт район газет оьзюню 80 йыллыгъын къаршылай. Шо уллу тарих эсделикде къалсын учун, Азнавур Гьажиев оьз янындан да бир-бир чаралар гёрежекни билдирди ва редакцияны къуллукъчуларына къаламын гьаман да асувлу къолламакъны ёрады.
Герейхан ГЬАЖИЕВ,
бизин мухбирибиз.
