Дагъыстанда автомашин юрюйген ёлланы узунлугъу 31 минг чакъырым бар. Шолардан 687-си федерал даражада, 7500-вю буса республика ва муниципал ёллар, Къалгъаны юртлардагъы ва шагьарлардагъы орамлагъа тие.

Дагъыстандан оьтеген «Темиркъазыкъ-Къыбла» федерал ёлгъа тергев йыл сайын арта. 2023-нчю йылда республикада 78 чакъырым уллу ёллар ва 14 кёпюр къурулгъан, 675 чакъырым ердеги ёллар да ва 5 кёпюр де ярашдырылгъан.

Суткада янгыз федерал ёлдан 35 мингге ювукъ машин оьте. 4 сызакъ ёллар да шо агъымны гьаран сыйышдыра деме ярай. Тергев янгыз федерал ёллагъа этилмей, республиканы ичиндегилери де янгыртыла.

Дагъыстангъа туристлени гелегени артгъан сайын, олар барма сюеген гёзел ерлерибизге элтеген ёллагъа да тергев арта. Шо гьакъда оьзлени жыйынларында Дагъыстанны Башчысы Сергей Меликов да, Гьукуматыны Председатели Абдул-муслим Абдулмуслимов да кёп керенлер эсгерген.

– Бугюнлерде бизин ёл къурувчу бёлюклер Буйнакск–Къызылюрт ёлну ярашдырма башлагъан,­ – дей Дагъыстанны транспорт ва ёл хозяйство министри Жамболат Салавов. – Шо ёлну биз Дубки юртну ичине элтеген, туристлер гёзелликге къарама гелеген ерлеге ерли янгыртажакъбыз. Бугюнлерде Солакъ къысыкъгъа, Чиркей ГЭС-ге элтеген ёллар республиканы минглер булангъы къонакълары учун аслу болуп къалды

Министр айтагъан кюйде, ёлну асфальт этген булан иш тамамланмай, оланы айланасын, белгилер ерлешдирип ва хырларын аманлыкъ барулар салып, къонакълар учун къоркъунчсуз этме тюше. Шолай да, шо ёллардан гьайванлар къыркъып чыкъмайгъан кюйде, ёл хырда сувлар токътамайгъан этип, ёлланы тюбюнден хас ерлер онгарма герек.

Кёп иш этилинген ва шо ёлну гёрсетилген гесегин бу айны ахырына пайдаландырывгъа берме бажарылажакъ.

 

ГЕБЕК КЪОНАКЪБИЕВ.