Артдагъы гюнлерде Бабаюрт район администрацияны залында районну ёлбашчысы Даниял Исламов жыйын оьтгерди. Онда районну къурумларыны, идараларыны ёлбашчылары ва къуллукъчулары ортакъчылыкъ этди.

 

Жыйында Москва шагьарда оьтгерилген «Гиччи Ватан – Россияны гючю» деген форумну гьакъында айта туруп, Даниял Исламов Россияны янгы тарихинде биринчилей савлай уьлкени шагьарларыны, юртларыны башчыларына ерли вакиллери жыйылгъанны эсгерди.

– Форумну иши ВДНХ-да, «Россия» деген Халкъара выставка-форумну дазуларында оьтдю. Программагъа «Гюч адамларда», «Гюч мердешлерде», «Гюч артдырывда» деген уьч гьакълашыв масъалалар, 32 дёгерек стол, 25 лекция гирген эди.

Форумда Бабаюрт райондан башында Даниял Исламов булан, бир номерли Львовск ва Герменчик юртланы ёлбашчылары Арслан Шемшединов ва Магьач Батырханов да ортакъчылыкъ этди. «Биз форумну дазусунда оьтгерилген пикру алышдырывларда, дёгерек столларда болдукъ, арагъа салынгъан масъалаланы чечивде оьз таклифлерибизни бердик», – деп къошду районну башы.

Даниял Исламов эсгереген кюйде, форум уьлкебизде ерли автономияны оьсювюню янгы девюрю болуп токътады.

 

Герейхан ГЬАЖИЕВ,

оьз мухбирибиз.