Абдулмуслим АБДУЛМУСЛИМОВ:
Арбагюн, август айны 14-нде, Дагъыстанны Гьукуматыны Председатели Абдулмуслим Абдулмуслимов генгеш оьтгерген. Шо генгешни барышында 2024-нчю йылны оьтген 7 айын гьисапгъа алып, бизин республиканы бюджетини гесимлери не къадар яшавгъа чыгъарылгъаны арагъа салынып ойлашылгъан. Шону булан бирге, ерли гьакимлик къурумлар булан дыгъарлар байлап иш гёрювню масъаласына да къаралгъан.
Дагъыстанны премьер-министри оьзюню гиришив сёзюнде билдиргени йимик, бу йылны оьтген 7 айыны ичинде бизин республиканы бюджетине налоглар гьисапда, олай да налог тюгюл оьзге гелимлер гьисапда 25,7 миллиард манат тюшген. Шо буса гёз алгъа тутулгъанындан эсе аз. Демек, бугюнлеге ерли республика бюджетни эсгерилген бёлюгю 97 процентге тюгюл толмагъан. Тек шо гетген йылны 7 айыны гьасиллери булан тенглешдиргенде 1, 7 миллиард манатгъа кёп болуп токътай.
Ол оьзюню сёйлевюн давам эте туруп эсгереген кюйде, бу йылны август айыны 1-не республиканы бюджетине гелим гьисапда 102 миллиард манат тюшген. Шо буса алмашынывлар этген сонг тасдыкъ этилип токъташдырылгъан къадарны 56,6 процентин тута.
Шо гьакъда айта туруп, бизин республиканы премьер-министри гьакимликни ерли къурумларыны жаваплы къуллукъчулары яшавгъа чыгъарылагъан пачалыкъ ва милли программалагъа ва проектлеге гёре кютюлмеге тюшеген ишлени артгъа салмай чалтлашдырмаса ярамайгъанын айтгъан.
Оьтгерилген генгешни барышында ДР-ни финанс министри Шамил Дабишев, къурулушлагъа, архитектурагъа ва яшавлукъ-коммунал хозяйствогъа къарайгъан министри Бахтияр Уллаев, олай да савлукъ сакълав министри Татьяна Беляева Дагъыстанны Гьукуматыны Председатели Абдулмуслим Абдулмуслимовну сёйлевюн толумлашдыргъан.
Шондан сонг, Дагъыстанны премьер-министри генгешни гюнлюк низамына гёре къаралагъан экинчи масъаланы агьамиятлыгъы гьакъында эсгерген. Дагъыстан Республиканы гьакимлик къурумлары заманында дыгъарлар байлап иш гёрсе, токъташдырылгъан болжалларда шоланы кютмеге бажарылагъанын ташдыргъан.
Ону сёзлерине гёре, ерли гьакимлик къурумлары гьар тюрлю ишлени кютеген идаралар булан 2024-нчю йылны август айыны 12-сине 25,2 миллиард манатгъа дыгъарлар байлагъан. Шо буса, дыгъарлар байланмагъа гёз алгъа тутулгъан къадарны 80 проценти болуп токътай.
ДР-ни пачалыкъны янындан алыш-бериш ишлерине къарайгъан Азер Нифталиев де генгешде арагъа салынып ойлашылагъан масъалагъа байлавлу оьзюню пикруларын ачыкъ этген. Гьакимликни республика къурумлары, айрыча алгъанда, министер-ликлери ва ведомстволары булан бирликде шо тармакъда гёреген гьаракатны гьасиллерин чыгъарды. ДР-ни Гьукуматыны Председателини заместители Руслан Алиев ва гьакимлик къурумларыны бир-бир ёлбашчылары да генгешде чыгъып сёйлеген.
Оьтгерилген генгешни жамын чыгъара туруп, Дагъыстанны Гьукуматыны Председатели республиканы бюджетини гесимлерин яшавгъа чыгъарывгъа байлавлу гьакимликни ерли къурумларына тийишли тапшурувлар берген.
Н. БАЙБОЛАТОВ.
