Яйны ахыры болгъанча Магьачкъала шагьарда гечеги ярмакюлер ишлежек. Дагъыстанны юрт хозяйство ва сурсат министерлигини сиптесине гёре ачылгъан ярмакюлерде, шагьарлылар учуз багьасына гёре юрт хозяйство маллар алма болажакъ.

Ярмакюлер гече сагьат ондан башлап, эртен 6 болгъанча ишлежек ва Батырайны орамындан Толстойну орамына ерли ерлешежек. Дагъыстанны Жамият палатасыны ортакъчысы Ислам Магьамматов айтагъан кюйде, шо ярмакюлер 31-нчи август болгъанча юрюлежек.

– Шолай ярмакюлени ишлевю эки аслу масъаланы чечме имканлыкъ бере, – дей И. Магьамматов. – Биринчиси, мал болдурагъанлар арачыларсыз оьзлер болдургъан малны учуз багьасына оьзлер сатажакълар. Экинчиси де, адамлар ишден къайтгъанда, чакъ да салкъын болгъанда айланып, сан янлы, тувра авлакъдан гелген малланы учуз багьада алып болажакълар.

И. Магьамматов айтагъан кюйде, ярмакюлени тахшагьарны кёп адамлар яшайгъан­ бойларына – 1-нчи Магьачкъалагъа, редукторный микрорайонгъа ва Аметхан Солтан орамны бир боюна чыгъарса, адамлагъа енгил болар. Шолай ерлерде таман чакъы ярыкъ болма ва адамланы аманлыгъын сакълав учун шартлар да яратылма герек болажакъ.

 

Г.БЕК.