Ихтиярлары дазулангъан жамиятгъа айландырылгъан «Къаягент» деген предприятие – Къаягент районда мугькам ва алдынлы предприятиелени бириси. Мунда аслу тармакъ – юзюмчюлюк. Юзюм бавлар 527 гектарда ерлешген. Шоланы 442 гектары тюшюм бере. Юзюм бавланы къуллукъларын 3 юзюмчюлюк ва трактор бригада кюте.
Артдагъы гюнлерде биз юзюмчюлюк бригадаланы бирисинде болдукъ, ишчилер ва оланы бригадири Мажит Агъаев булан ёлугъуплакъырэтдик. Бригадагъа башчылыкъ этегени кёп болмай буса да, Мажит юрт хозяйство тармакъда янгы адам тюгюл. Ол оьмюрюню кёп йылларын юрт хозяйствогъа багъышлагъан, яхшы сынав топлагъан касбучу.
Бугюн бригада юзюмчюлюк тармакъда алдынлылардан санала. Бригаданы татли емиш береген бавлары 76 гектарда ерлешген. Шоланы 37 гектары тюшюм бере, къалгъан 39 гектары емиш бермеге башлайгъан янгы юзюм бавлар.
Иш йылны боюнда бегетилген юзюм бавларда 15-20 адам загьмат тёгюп турду. Тийишли гезиклерде ягъадан да кёмек чакъырылды. Оланы барысы да юзюмчюлюк касбуну усталары, юзюмчюлюкде загьмат тёгегени кёп йыллар бола. Гьаракатчы янашывну натижасында ишчилер бу загьмат йылда да бары да агротехника чараланы заманында ва сан яны булан оьтгердилер. Натижада бригадагъа бегетилген бавларда яхшы тюшюм оьсдюрюле.
– Бу йыл гьава шартлар лап биз сюеген кюйде болмаса да, яман да тюгюл, – дей бизин булангъы лакъырлашывунда, бригадир Мажит Агъаев. Гьава шартлары, сувукълар жан-жаныварны оьлтюре, исси гюнлер коллективге авлакъ ишлени кютмеге имканлыкълар ярата. Юзюм бавлардагъы бары да ишлер бек жаваплы. Оланы белгиленген болжалларда тюз ва чалт юрютмеге тарыкъ. Йылны тюшюмю сан яны булангъы чалышывдан гьасил бола. Шону учун гьар юзюмчюню ишине бек тергев беребиз, кемчиликлерини алдын алабыз. Бугюнлерде бары да юзюмлюклерде дарманлар себив, сугъарыв ишлер булан машгъулбуз.
Ишчилени гьариси гьалны тюз англай ва бригадир айтагъандай ишни сан янлы оьтгермеге гьаракат эте. Сонг да, юзюмлюклени сыдра араларына даим культивация этиле. Эгер сувукълар, янгурлар пуршавлукъ этмесе, бавлардагъы ишлер бёлюнмей юрюлежек.
Алдынлы бригаданы ишине бизин булангъы ёлугъувунда предприятиени директору Магьамматшакир Алибеков оьр къыймат берди. Къыйынлы гьава шартлагъа да къарамайлы, бригаданы гьар ишчиси яхшы умутларын яшавгъа чыгъармакъ муратда белсенип ишлейлер. Шо буса гьар кимни юрегинде къуванчлыкъ тувдура.
Сонг да, Мажит Агъаев ишчилер учун ял алмагъа бавларда яхшы шартлар яратгъан. Тюш ашны вакътисинде, ишден бош заманларда олар бригадирни гьаракаты ва гючю булан онгарылгъан хас къурулушну тюбюнде тизилген столларда, олтурмагъа этилген ерлерде ерлешелер.
Сыкълашгъан коллектив 2024-нчю йылда янгы уьстюнлюклеге етишежегине шекленмейбиз.
Магьамматрасул ИБРАГЬИМОВ,
Къаягент район
