Март айны 15-нден 17-не ерли Россияны Президентин сайлавгъа багъышлангъан уьч гюнлюк сайлавлар юрюлежек.

Алдындагъы гюн уьлкени башчысы В.Путин сайлав участкалагъа гелип, оьзлени ватандаш борчун кютсюн учун россиялылагъа чакъырыв этди.

–Сайлавлар – гележекге этилеген абат, гьар адамны тавушундан  уьлкени нечик болажагъы гьасил. Сайлавларда биз бирликде алгъа барма токъташгъынлыкъны ва гьазир экенни гёрсетме герекбиз, — деди Владимир Путин. –Ватанны къысматын токъташдырагъан ону халкъы, мен буса шолар Россияны уьстюнлю, гючлю, эркин ва яшнайгъан пачалыкъ болуп гёрме сюегенни билемен ва инанаман…

Газетни печатгъа бергенче бизге Дагъыстанны сайлав комиссиясындан етишген маълуматлагъа гёре, уьч де гюн сайлав участкаланы эшиклери сагьат 8-де ачылажакъ ва 20 сагьатда ябулажакъ.

Россияны Президенти болмакъ учун оьзлени кандидатураларын дёртев салгъан: Леонид Слуцкий, Николай Харитонов, Владислав Даванков ва Владимир Путин.

Сайлав кампания 54 территория ва 1862 сайлав участкаларда юрюлежек ва шонда 14 минг сайлав комиссияны ортакъчылары машгъул болажакъ. Республикада 1,7 миллион сайлавчу гьисапгъа алынгъан ва 18 йыл болагъан ватандашлар ортакъчылыкъ этме ихтияры бар.

Сайлавлар юрюлеген кюйгню тергемек учун 6275 гёз къаратывчу болажакъ. 688 участкада видеокамералар салынгъан. Бюллетенлени ишлетеген 137 къурал да ишлей.

Сайлав комиссияланы ишин аян этмек учун ихтияр 28 маълумат къуралгъа ва 117 журналистге берилген.

Сайлавчуланы аманлыгъын сакъламакъ учун тарыкъ чакъы ич ишлени къуллукъчулары къуршалгъан, ярыкълар тайып къалса, ишни ярашдырмагъа 670 къуллукъчу да гьазир болгъан.

 

Гебек КЪОНАКЪБИЕВ.