Генгешде ДР-ни Халкъ Жы­йыныны миллет аралыкълагъа, жамият ва дин бирлешивлени ишлерине къарай­гъан комитетини председатели Людмила Авшалумова, министерлик­лени, ведомстволаны, республика ва федерал маълумат къуралланы вакиллери ортакъчылыкъ этди.

Бурлият Токъболатова маълумат булан таъмин этивде министерлик 2016-нчы йылда яшавгъа чыгъаргъан чараланы гьакъында айтды. Террорчулукъну ва экстремизмни алдын алмакъ учун этилеген гьаракатгъа, олай да шо масъа­лаланы уьстюнде ишлейген журналистлени касбу бажарывлугъуна, сонг да гьакимликни ва жамиятны арасында гьакълашывну болдурувгъа, бизин республиканы ерли гьакимлик къурумларыны чалышыву гьакъда маълумат яйывуну асувлугъун артдырывгъа оьзюню сёйлевюнде аслу тергев берди.

– Инг алда 2016-нчы йылда шо тармакъда бизин министерликни чалышывун мекенлешдиреген къарарлагъа алмашынывлар этилгенин айрыча эсгермеге тюше. Ачыкълашдырып айтгъанда, террорчулукъну ва экстремизмни алдын алывгъа байлавлу чараланы яшавгъа чыгъа­рывда бизин министерликни ихтиярларын артдырагъан къарарны проекти Дагъыстанны Гьукуматына бакъдырылгъан. Шолай толумлашдырывлар ДР-ни печатгъа ва маълуматгъа къарайгъан министерлигини табилигиндеги идараларыны ёлбашчылары булан байлангъан загьмат дыгъарлагъа да этилген,– деп англатыв берди министр.

Шондан сонг, Бурлият Токъболатова Дагъыстанны Башчысы Рамазан Абдулатипов ДР-ни Халкъ Жыйынына Чакъырыв кагъызында берген тапшурувланы гьакъында да жыйылгъанланы эсине салды.

– Террор ва террорчулар кимлер экени закон булан токъташдырылмай туруп, маълумат къуралларда террорчулукъгъа къаршы иш юрютмеге бажарылмай. Террорчулукъ гьаракатда ортакъчылыкъ этегенлер барысы да террорчулар гьисаплана. Бир-бир маълумат къуралларында олагъа «сепаратистлер» , «экстремистлер», «шагьитлер» деп айтып, террорчуланы «политика агьамиятлыгъын» артдыра, – деди дагъы да министр.

Коллегияны ортакъчылары министрни сёйлевюн арагъа салып ойлашды ва 2016-нчы йылда алда токъта­гъан агьамиятлы масъалаланы уьстюнде айрыча токътады.

Ёлугъувну оьзге ортакъчылары да генгешни барышында чыгъып сёйледи. ДР-ни печатгъа ва маълуматгъа къарайгъан министрини заместители Сергей Снегирёв маълумат къураллар Интернетде ва социал торларда гёреген гьаракаты гьакъда айтды. Интернет журналистиканы тармагъында билимлерин артдырывгъа артдагъы вакътилерде айрыча тергев артгъаны гьакъда эсгерди. «Дагъыстан Респуб­ликада 2016-нчы йылда террорчулукъну алдын алывгъа байлавлу комплекс программасыны» яшавгъа чыгъывуна да ол агьамият берди.

Генгешни ахырында бажарывлу журналистлеге бизин республиканы печатгъа ва маълуматгъа къарайгъан министерлигини гьюрметлев грамоталары тапшурулду. Гьар тюрлю къаравларда алдынлыкъ алгъан маълумат къуралларыны къуллукъчуларына да савгъатлар берилди.

Бизин мухбирибиз.