Белгили экени йимик, эсгерилеген шо газет бизин уьлкеде француз тилде 2002-нчи йылны декабр айындан берли чыгъарыла. Ачыкълашдырып айтгъанда, ону бетлеринде бизин уьлкени политика, экономика ва жамият, олай да маданият яшавуна багъышлангъан макъалалар ер таба. Газетни къуллукъчуларыны сёзлерине гёре, оьзлер басмагъа онгарагъан макъалаларда бизин уьлкедеги гьалланы дурус кюйде суратламакъны гьаракатын болдура.
Газетни президенти, белгили язывчу Жан-Феликс де ля Виль Боже инг алда шо гьакъда эсгерген сонг, бир жуманы узагъында оьзлер болгъан Гуниб, Къызлар, Цумада, Къаягент районлагъа гиреген юртлагъа, Магьачкъала, Каспийск, Дербент шагьарлагъа этген сапарыны вакътисинде тувулунгъан гьислерин жыйылгъанлагъа малим этди. Бизин республиканы бары да тармакъларындагъы гьаллар гезетни ювукъда чыгъарылажакъ номерини бирисинде айтылажагъы гьакъда билдирди.
– Биз «Le Courrier de Russie» газентни савлай номерин Дагъыстангъа багъышлап гьазирлемек учун тавлар элине гелгенибизни аслу мурады болуп токътай. Бизин газетни он уьч йыл алъякъда Россияда яшайгъан Эммануэль Киде ва Жан Люк Пипон чыгъармагъа башлагъан. Олар француз маълумат къуралларда Россияны яшаву гьакъыкъатгъа къыйышагъан кюйде суратланмай деп гьисап этген. Гертилей де, шо заманларда Францияда чыгъарылагъан газетлерде янгыз урушбатчылыкъ ва жинаятчылыкъ уьюрлени, олай да ичкичиликни гьакъында айтылагъанда Россияны аты эсгериле эди. Шону гёз алгъа тутуп, газетни къуллукъчулары Россияны гьакъында охувчуланы арасында дурус пикру яратмакъны алдына борч этип салгъан,– деди ол. – Газетни охувчуларына ону гьар номеринде Россиядагъы гьаллагъа байлавлу белгили касбучуланы баянлыкълары, пикру алышдырывлары, сонг да атлары дюнья оьлчевюнде айтылгъан россиялы ва француз язывчулар, художниклер, политиклер, далапчылар, спортчулар, музукантлар булан юрюлген лакъырлашывланы охумагъа имканлыкъ бериле,– деп узатды ол сёзюн дагъы да.
Шону булан бирге, Жан-Феликс де ля Виль Боже Россияда ва ондан тышда Дагъыстанны гьакъында тувулунгъан пикругъа асасланып, бизин республикагъа сапар чыкъгъанча кёп ойлашса да, мунда яшайгъанланы ругьдан тюшмейгенин гёрюп, оьзю де айрыча сююнгени ва ругьлангъаны гьакъда эсгерди.
Прес-конференцияны барышында белгили болгъаны йимик, газетни гьар къуллукъчусу бир нече масъалагъа айрыча агьамият бережек. Шолай, газетни сайтыны редактору Тома Гра оьзюню макъалаларында дагъыстанлы бусурманланы яшавуну, олай да жагьиллени арасындагъы маданият агъымланы гьакъында язажакъ. Газетни редакторларыны бириси Манон Массет охувчулагъа бизин республиканы юртларында яшайгъанланы талигьи ва бырынгъы Дербент шагьарны тарихи гьакъда маълумат бережек. Журналист Константин Барко бизин республиканы спорт яшаву гьакъда айрыча айтажакъ. Туризмни оьсювюню шартларына Анастасия Седухинаны, дагъыстан тиллени, олай да балыкъчылыкъ тармакъны масъалаларына Русина Шихатованы макъалаларында тергев берилежек.
Прес-конференцияны ахырында француз журналистлер оьзлени сапарын оьтгермеге болушлукъ этгенлеге, бизин республикада ашын да, къашын да берип дегенлей оьзлени исси кюйде къаршылагъанлагъа барысына да бир гёнгюлден разилигин билдирди. Оьзлени дагъыстанлы къаламдашларыны кёп санавдагъы соравларына олар иштагьлы кюйде жаваплар да къайтарды.
Насрулла БАЙБОЛАТОВ.
