13-нчю февральда Дагъыстанны Халкъ Жыйыныны председатели Завур Аскендеров ерли муниципал къурулувланы жыйынларыны ёлбашчылары булан ёлугъув оьтгерди. Шонда «халкъ депутатлардан» къайры, Дагъыстанны Гьукуматыны, администрациясыны, Жамият палатасыны ва Халкъ Жыйын-дагъы яшёрюм парламентини вакиллери ортакъчылыкъ этдилер.

 

– Бизин шу къайдадагъы депутатлар булан этилинеген жыйын халкъыбыз учун пайдалы болар деп эсиме геле, – деди, жыйынны ача туруп, З.Аскендеров. – Биз мунда пикру алышдырма, федерал даражадагъы къайдаланы къоллавну гьакъында жанлы лакъыр этме болабыз. Ачыкъ гьакимликни гьакъында оьзлени чакъырывларында Россияны Президенти В.Путин ва Дагъыстанны Башчысы С.Меликов да айтды. Биздеги бары да депутатланы санаву 9 мингге етише, бизин биригип иш гёрювюбюз тувулунгъан масъалаланы чечме ва сайлавчуланы тапшурувларын заманында кютме имканлыкъ бережек.

Ол депутатланы законланы къабул этегенде оьзлени ихтиярларын къоллама, аслу масъалаланы чечегенде, гьатта тергев ишлерде де актив кюйде ортакъчылыкъ этме чакъырды. Олар юрюлюп турагъан къурулушланы сан янындан башлап, муниципалитетлени адамланы талапларын, гьатта бюджетни къоллавну юрюлеген кююне ерли тергев этме бола. Шолай да, юртланы ва шагьарланы гёрюнюшюн алмашдырывгъа, топуракъ пайлавгъа, ёлланы ва башгъа ерлени къурувгъа, бюджетге къошум харжлар гелеген кюйге де тергевню бакъдырмакъны гьакъында айтды.

– Юртларда, шагьарларда ва районларда юрюлеген ишлеге депутатлар жаваплы экенни унутма тюшмей, — деп давам эте З.Аскендеров. – Депутатлар ихтиярларындан къайры, борчларын да билме герек. Халкъ булангъы ёлугъувлар, адамланы къабул этив, хас асгер гьаракатда ортакъчылыкъ этегенлени агьлюлери булангъы ёлугъувлар, дин идараланы, спортну ва маданият къуллукъдагъыланы ёлбашчылары ва ортакъчылары булангъы ёлугъувлар да токъталма тюшмей.

Шолай ёлугъувларда гьалны теренден билме ва шону чечмекни ёлларын сайлама енгил болагъанны айта туруп, гьар депутатны сиптечилигинден кёп зат гьасил болагъанны да эсгерди. Россияны Президентин сайлавгъа да болагъан кёмекни этме чакъырды.

Этилген ишлени гьа­къын­да комитетлени ёлбашчылары гьисап бердилер ва ерли муници­палитетлеге толу кюйде ишлемек учун харж ва ихтиярлар берилмейгени гьакъында, толу кюйде оланы дазулары гьали де токъташдырылмагъаны гьакъында да айтылды.

Сонг Халкъ Жыйынны Совети къурулду, ёлбашчысы ва орнунбасарлары сайланды. Советни тюрлю-тюрлю тармакълагъа къарайгъан комиссиялары да токъташдырылды.

Завур Аскендеров жыйыл­гъанлагъа баракалла билдирди ва ерли депутатланы Совети Дагъыстанны Халкъ Жыйыныны пайдалы, тувулунгъан  масъалаланы чечеген герти кёмекчиси болажакъгъа инанагъанын айтды.

 

Гебек КЪОНАКЪБИЕВ.